З Беларусі госці "Еўрабачання" павязуць цукеркі, валёнкі і... мядзведзяў

22.10.2010

<div><i>"Звязда", 22 октября 2010 г.</i></div>Адзін месяц застаецца да фіналу дзіцячага конкурсу песні "Еўрабачанне-2010". Як сапраўдныя гаспадары, арганізатары на чале з Белтэлерадыёкампаніяй ужо паклапаціліся пра памятныя сувеніры, культурную праграму і пражыванне юных артыстаў. І пакуль сталічныя аўтобусы раз'язджаюць з лагатыпамі конкурсу на борце, а рэжысёры б'юцца над пастаноўкай шоу, вядучыя конкурсу развучваюць 14 (!) розных танцаў... Але гэта далёка не ўсе падрыхтаваныя сюрпрызы.

"Звязда", 22 октября 2010 г.


Адзін месяц застаецца да фіналу дзіцячага конкурсу песні "Еўрабачанне-2010". Як сапраўдныя гаспадары, арганізатары на чале з Белтэлерадыёкампаніяй ужо паклапаціліся пра памятныя сувеніры, культурную праграму і пражыванне юных артыстаў. І пакуль сталічныя аўтобусы раз'язджаюць з лагатыпамі конкурсу на борце, а рэжысёры б'юцца над пастаноўкай шоу, вядучыя конкурсу развучваюць 14 (!) розных танцаў... Але гэта далёка не ўсе падрыхтаваныя сюрпрызы.

"Еўрабачанне" адкрые дуэт Ксеніі Сітнік і Аляксандра Рыбака

Пачынаючы з 20 кастрычніка, "Мінск-Арэну" закрыюць для падрыхтоўкі песеннага шоу. За мантаж сцэны дзіцячага "Еўрабачання" адказвае група шведскіх спецыялістаў у складзе 40 чалавек.
- Беларусь называюць "зямлёй пад белымі крыламі" - вось гэта і стане асновай дызайну сцэны, шмат элементаў будуць паўтараць лагатып конкурсу, - гаворыць дызайнер сцэны Ульф Мартэнсан. - У афармленні будуць выкарыстаныя таксама і колеры лагатыпу. У такім жа стылі ўбачым і зялёны пакой.
Сцэна будзе складацца з некалькіх канструкцый - круглых подыумаў, якія па форме нагадаюць крылы, - дзе будуць выступаць артысты і стаяць вядучыя. Плануецца, што трансляцыя будзе весціся з дапамогай 11 камер.
Вядучыя конкурсу Лейла Ісмаілава і Дзяніс Кур'ян, якія самі працуюць над сваім сцэнарыем, павінны будуць развучыць танцы да кожнай з 14 конкурсных песень і выконваць іх падчас гучання песні.
А на ўрачыстым адкрыцці гледачоў чакае неспадзяванка: Ксенія Сітнік заспявае дуэтам з Аляксандрам Рыбаком. "Мы хацелі яшчэ раз паказаць Еўропе двух яркіх пераможцаў. Таму прапанавалі спяваць разам Ксеніі Сітнік (пераможцы дзіцячага "Еўрабачання-2005") і Аляксандру Рыбаку (пераможцу "Еўрабачання-2009"). Паверце, гэта будзе штосьці новае", - адзначаюць арганізатары. Ксенія і Аляксандр выканаюць песню "Hеllо, Еurоvіsіоn!" ("Прывітанне, Еўрабачанне!"). Будучы еўравізійны хіт будзе нагадваць дыялог: Ксенія і Аляксандр урыўкі з песні будуць спяваць па чарзе.

Валанцёры з сярэднім балам 8,5

Для абслугоўвання дзіцячага "Еўрабачання-2010" было адабрана каля паўтысячы студэнтаў-валанцёраў. Адбор праходзіў у розных ВНУ сталіцы, прычым выбраныя студэнты павінны былі адпавядаць неабходным крытэрыям: высокі сярэдні бал (8-8,5) і добрыя рэкамендацыі ад выкладчыкаў. Тыя, хто валодае замежнымі мовамі (у асноўным, студэнты Лінгвістычнага ўніверсітэта), будуць працаваць на найбольш адказных мерапрыемствах - суправаджаць замежныя дэлегацыі і юных артыстаў. Увогуле без валанцёраў не абыдзецца ніводзін конкурсны аб'ект. Праца на інфармацыйных стойках, у дзіцячым пакоі, у "Мінск-Арэне", на бэк-стэйджу. Зараз валанцёры праходзяць інструктаж. Некаторым з іх давядзецца спрабаваць свае сілы і ў якасці гідаў, прэс-аташэ і работнікаў Еўраклуба.

Мая тваю каб разумелі

Падрыхтоўку да прыёму замежных гасцей распачалі не толькі арганізатары конкурсу. Свой план падрыхтоўкі ёсць і ў супрацоўнікаў міліцыі. Супрацоўнікі праваахоўных органаў "Мінск-Арэны" будуць карыстацца спецыяльна распрацаваным 5-моўным размоўнікам. Невялікая ў памерах кніга-слоўнік лёгка змяшчаецца ў кішэні і пры неабходнасці дапаможа паразумецца на англійскай, нямецкай, польскай, французскай і іспанскай мовах.
- Размоўнік быў падрыхтаваны прафесарска-выкладчыцкім складам па замове Міністэрства ўнутраных спраў, - зазначыла загадчык кафедры беларускай і замежных моў Акадэміі МУС Святлана Дзянісава. - Адзін з раздзелаў выдання можа быць карысны для прадстаўнікоў Дзяржаўтаінспекцыі: ён дапаможа размаўляць з іншаземцамі, якія знаходзяцца за рулём. Таксама ў кнігу на ўсякі выпадак дададзеная частка, прысвечаная зносінам у крымінальных сітуацыях.

Валёнкі, вышываныя крыжыкам

Самы хвалюючы момант: што атрымаюць замежнікі ў якасці беларускага сувеніра? Як распавёў карэспандэнту "Звязды" намеснік загадчыка аддзела карпаратыўных праектаў і промамерапрыемстваў Белтэлерадыёкампаніі, галоўны дырэктар продажу і маркетынгу Пётр Садоўскі, у склад беларускіх промапакетаў увойдуць жоўтыя цацачныя мядзведзі, дэкаратыўныя валёнкі і сувенірныя гліняныя гаршчочкі з цукеркамі.
- Першапачаткова ў нас была ідэя зрабіць цацку зубра, - гаворыць Пётр Садоўскі. - Зубр - як сімвал Беларусі. Але пасля ад гэтай ідэі вырашылі адмовіцца: не ўсе ў Еўропе разумеюць, што гэта за звер, часта блытаючы яго з быком. Таму мы спыніліся на цацачных мядзведзях. Мядзведзь - гэта найбольш пазітыўны для дзяцей персанаж.
Адмысловыя валёнкі выраблялі на Смілавіцкай валяльна-лямцавай фабрыцы. Лагатып конкурсу - вясёлкавыя крылы - наносілі на валёнкі ўручную, вышываючы крыжыкам. Зараз ужо падрыхтавана 150 пар абутку. Валёнкі ўяўляюць сабой дэкаратыўны абутак 23-памеру, не прыстасаваны для носкі.
Адмысловыя гліняныя гаршчочкі выраблялі ў Івянцы майстры тамтэйшага цэнтра ганчарнага рамяства. Прычым самі гаршчочкі - прыкладныя і шматфункцыянальныя, з іх нават можна піць гарбату. У гаршчочках будуць шакаладныя цукеркі фабрыкі "Іўкон". Рэцэпт цукерак распрацоўвала адмысловая група экспертаў-кандытараў.
Як зазначыў Пётр Садоўскі, цукеркі, цацачныя мядзведзі і дэкаратыўныя валёнкі ў гандлёвую сетку, на жаль, не паступяць. Між іншым, усё гэта можна будзе набыць у "Мінск-Арэне" напярэдадні конкурсу. Дадаткова прыхільнікам "Еўрабачання" будуць прапанаваныя і іншыя сувеніры: сумкі з ільну, байкі, заплечнікі, алоўкі, ручкі, канверты, музычныя дыскі, шалікі і рукавіцы. Усе прадметы - з лагатыпам конкурсу.

А тым часам

Беларус Данііл Казлоў на сцэну "Мінск-Арэны" выйдзе пад нумарам 12. Парадкавы нумар прадстаўніка Беларусі быў вызначаны жараб'ёўкай. Краіны, якія выступяць пад нумарам 1 і нумарам 14, жараб'ёўкай вызначылі журналісты - гэта Літва і Македонія адпаведна. Астатнія канкурсанты былі раздзеленыя на групы А і В. Тыя, якія трапілі ў групу А, выступяць у першай палове канцэрта, у групу В - у другой. Парадак выступлення ў гэтых групах арганізатары вызначалі з улікам пажаданняў рэжысёра шоу, зыходзячы з накіраванасці кампазіцый.

Такім чынам выступленне канкурсантаў будзе выглядаць так:

1. Літва - Ноюс Барташка ("Окі-докі").
2. Малдова - Штэфанел Рашкаван ("Алі-Баба").
3. Нідэрланды - дуэт Ганны і Сенны ("Мая сям'я").
4. Сербія - Соня Шкорыч ("Зорная ноч").
5. Украіна - Юлія Гурская ("Мой самалёт").
6. Швецыя - Джазэфін Рыдэл ("Усё, што я хачу").
7. Расія - дуэт Сашы Лазіна і Лізы Дрозд ("Хлопчык і дзяўчынка").
8. Латвія - Шарлоттэ Лэнман ("Vіvа Lа Dаnсе").
9. Бельгія - дуэт Джыль і Лаўрэн ("Будзь рашучым!").
10. Арменія - Уладзімір Арзуманян ("Мама").
11. Мальта - Ніколь Аццапардзі ("Knосk Knосk! Bооm! Bооm!").
12. Беларусь - Данііл Казлоў ("Музыкі свет").
13. Грузія - Марыям Кахелішвілі ("Мары-Дары").
14. Македонія - Аня Вецерава ("Еооо, Еооо"). 

Ілья ЛАПАТО.