Далучанасць да існасці падзей

17.07.2004

<div><i>“Культура”, 17 ліпеня 2004 г.</i></div>Калі старажытны чалавек спазнаваў свет толькі з дапамогай уласных органаў пачуццяў, дык цяпер гэтыя функцыі ўзялі на сябе сродкі масавай інфармацыі. Менавіта ад СМІ шмату чым залежыць, ці будуць водбліскі "Славянскага базару ў Віцебску" бачныя ў тых далёкіх краях, дзе пануе вечная мерзлата, альбо, наадварот, ніколі не бывае снегу. Тамму працу журналістаў па асвятленні ходу фестывалю цяжка пераацаніць.

“Культура”, 17 ліпеня 2004 г.


Калі старажытны чалавек спазнаваў свет толькі з дапамогай уласных органаў пачуццяў, дык цяпер гэтыя функцыі ўзялі на сябе сродкі масавай інфармацыі. Менавіта ад СМІ шмату чым залежыць, ці будуць водбліскі "Славянскага базару ў Віцебску" бачныя ў тых далёкіх краях, дзе пануе вечная мерзлата, альбо, наадварот, ніколі не бывае снегу. Тамму працу журналістаў па асвятленні ходу фестывалю цяжка пераацаніць.
Пра тое, як яна арганізавана сёлета, распавядае - па нашай просьбе - міністр інфармацыі Рэспублікі Беларусь Уладзімір РУСАКЕВІЧ.

- Цяпер, калі акрэдытацыя журналістаў на "Славянскі базар у Віцебску" ўжо скончана, можна казаць пра маштабы цікавасці прэсы да гэтай падзеі.
- Сёлета яна была традыцыйна вялікая - пра што могуць засведчыць хаця б сухія лічбы. Так, на фестываль прыедзе 46 журналістаў з беларускіх выданняў і радыёстанцый, а з суседняй Расіі іх будзе нават на два болей - 48. Украіну прадстаўляе 11 журналістаў. Прэса іншых краін - Балгарыі, Польшчы, Малдовы, Сербіі і Чарнагорыі - дэлегавала на "Славянскі базар у Віцебску" агулам 30 чалавек. Вядома, актыўна асвятляць фестываль будуць бадай усе віцебскія СМІ - ад іх мы атрымалі заяўкі на акрэдытацыю 33 журналістаў. А найбольш прадстаўнічай на форуме стане група супрацоўнікаў Белтэлерадыёкампаніі.

- Беларускія тэлегледачы ніколі не скардзіліся на прадмет сваёй "адлучанасці" ад фестывальных імпрэз. А ці будуць яны гэтаксама паўнавартасна прадстаўлены і на "блакітных экранах" нашых суседзяў?
- Так, будуць. 1 - 2 сакавіка наша Міністэрства правяло перамовы з кіраўніцтвам Усерасійскай дзяржтэлерадыёкампаніі наконт арганізацыі асвятлення сёлетняга "Славянскага базару ў Віцебску" на тэлеканале "Расія". У выніку гэтых перамоў быў заключаны трохбаковы дагавор аб супрацоўніцтве Нацыянальнай дзяржтэлерадыёкампаніі РБ, дырэкцыі "Славянскага базару" і УДТРК. Ён прадугледжвае забеспячэнне тэлевізійнага запісу і трансляцыі ўсіх асноўных фестывальных імпрэз: урачыстага адкрыцця фестывалю, конкурсу маладых выканаўцаў, Дзён культуры Расіі, Беларусі і Украіны, урачыстага закрыцця форуму. Будуць там і рэгулярныя выпускі "Дзённіка фестывалю" з падрабязнай справаздачай аб асноўных падзеях кожнага дня.
Дзякуючы гэтаму дагавору, "завочна" папрысутнічаць на фестывалі здолеюць усе, хто мае доступ да спадарожнікавага тэлеканала "РТР-Планета". А аўдыторыя ў яго немаленькая - зважаючы хаця б на тое, што абсяг трансляцыі гэтага канала ахоплівае 35 краін свету.
Асноўныя фестывальныя імпрэзы цалкам убачаць таксама і гледачы тэлеканала "Мір", які вяшчае на краіны СНД і Балтыі. У блокі навін гэтага канала рэгулярна будуць трапляць спецыяльныя рэпартажы і сюжэты.
Акрэдытацыю па лініі Міністэрства замежных спраў атрымалі таксама і здымачныя групы тэлеканалаў "НТБ", "ТВЦ", "Першы канал" (Расія). Такім чынам, даведацца пра тое, што робіцца ў фестывальным Віцебску гэтымі ліпеньскімі днямі, здолеюць усе, хто таго зажадае.

- Водгукі адносна арганізацыі працы СМІ на “Сдавянскім базары” мне даводзілася чуць і чытаць толькі станоучыя. Але, магчыма, сёлета фестываль здолее парадаваць акрэдытаваных журналістаў нейкімі прыемнымі інавацыямі?
- Безумоўна, такія прыемныя інавацыі будуць. Перш-наперш, гэта тычыцца колькасці прэс-канферэнцый - іх будзе значна больш, чым у мінулым годзе. I тэматыка іх вельмі разнастайная - будзе зроблена ўсё, каб журналісты ні ў якім разе не маглі скардзіцца на "інфармацыйны голад".
Што да фестывальнага прэс-цэнтра, спадзяюся, тых тэхнічных сродкаў якімі ён забяспечаны, цалкам хопіць на тое, каб вырашыць практычныя пытанні, звязаныя з працай акрэдытаваных на фестывалі журналістаў, а пакінуць ім толькі творчыя. Сёлета там будзе каля 10 камп'ютэраў - нашмат больш, чым летась, - кожны з якіх падключаны да Інтэрнета, сеткавы прынтэр, два факсы, памнажальная тэхніка - і, вядома ж, тэлефоны. Карыстацца ўсім гэтым - у тым ліку факсавай ды тэлефоннай сувяззю, - натуральна, можна будзе бясплатна. А каб надаць "майстрам пяра і мікрафона" імпэту ды бадзёрасці, у прэс-цэнтры іх пачастуюць добрай кавай.
Але функцыі прэс-цэнтра ўсім гэтым не абмяжоўваюцца. Для таго, каб спрасціць працу журналістаў, двойчы на дзень яго супрацоўнікі будуць рыхтаваць прэс-рэлізы з інфармацыяй пра ўсе падзеі бягучага дня. Дарэчы, адразу пасля акрэдытацыі прадстаўнікі СМІ атрымліваюць праграму фестывалю. Яна ўключана ў прызначаны для журналістаў змястоўны камплект інфармацыйных матэрыялаў, куды ўвойдуць таксама ілюстраваныя буклеты са звесткамі пра гісторыю фестывалю, удзельнікаў конкурсу маладых выканаўцаў ды членаў журы. А непасрэдна наша міністэрства парадуе прэсу сваімі падарункамі. Сярод іх - прывітальная паштоўка, кнігі "Інфармацыйная прастора Беларусі" і "Знаёмцеся - Беларусь".
...Адным, словам, будзе зроблена ўсё, каб журналісты, якія прыязджаюць у Віцебск з розных краёў, адчувалі сябе там як мага больш утульна, каб яны не згубіліся ў віхуры фестывальных падзей, каб іх падарожжа па дзівосным і шматлюдным "Славянскім базары" было прыемным.
- Дзякуй за гутарку, Уладзімір Васільевіч!

Гутарыў Ілля СВІРЫН.