"А вы ведаеце, калі прыручылі свінню?"

"А вы ведаеце, калі прыручылі свінню?"

25.02.2011

<div><i>"Звязда", 25 лютага 2011 г.</i></div>Новы праект тэлеканала "ЛАД" сцвярджае, што адказаць на гэта пытанне можа нават шасцікласнік

"Звязда", 25 лютага 2011 г.


Новы праект тэлеканала "ЛАД" сцвярджае, што адказаць на гэта пытанне можа нават шасцікласнік
Алег Аднакозаў, шасцікласнік гомельскай школы №61, прыехаў у сталіцу на адзін дзень - разам з педагогам ён будзе здымацца на тэлебачанні. Хлопчык упершыню ўдзельнічае ў здымках, і адразу - у цэнтры ўвагі відэакамер.
"Нічога не баюся, і зусім не хвалююся," - расказвае хлопчык "Звяздзе". Такіх, як Алег, шасцікласнікаў - на здымкі прыехала яшчэ некалькі дзясяткаў. Навошта? З пятага сакавіка тэлеканал "Лад" запускае ў эфір новую перадачу для школьнікаў "Дзеці новага пакалення" - тэлевізійны конкурс-віктарыну.
У кожнай перадачы на пытанні вядучых будуць адказваць вучні пэўных класаў - у першых выпусках мы пабачым шасці- і сямікласнікаў. Прыняць удзел у інтэлектуальнай віктарыне можа любы беларускі школьнік ва ўзросце 12-17 гадоў (6-11 клас). Для гэтага трэба мець добрую памяць і логіку, а яшчэ - веды ў розных галінах (ад гісторыі і матэматыкі да спорту і поп-культуры).

Гуляць, як літоўцы

Упершыню падобная гульня прайшла ў Літве, а прыдумаў яе літоўскі прадзюсар Лаўрынас Шэшкус. Сёння дзякуючы вопыту прыбалтыйскай краіны "Дзяцей новага пакалення" шукаюць таксама ў Нарвегіі і іншых скандынаўскіх краінах, а з нядаўняга часу - і ў Беларусі.
- Я памятаю сябе, калі быў школьнікам, - расказвае "Звяздзе" Лаўрынас. - Калі шчыра, мы не вельмі любілі тых, хто добра вучыўся. І самы вялікім кампліментам для мяне з моманту пачатку праекта ў Літве стала "дзякуй" ад бацькоў удзельнікаў: "Праз гэту перадачу наша дзіця пачалі паважаць у школе, - казалі яны, - дзіця стала пазітыўнай зоркай школы, а раней на яго глядзелі, як на завучку". І па-мойму, гэта лепшая ўзнагарода. Калі лідарамі школы становяцца старанныя ў вучобе дзеці, а не наадварот.
Сёння ў Літве гэта перадача існуе ўжо трэці год. У ёй прымаюць удзел дзеці з пятага па дванаццаты клас (у Літве дванаццацігадовая школьная сістэма - І.Л.). І паводле слоў Лаўрынаса, віктарына карыстаецца вялікай папулярнасцю: у 2009 годзе перадача атрымала прыз глядацкіх сімпатый, як лепшая праграма года.
- Калі я ствараў гэту перадачу, то паставіў перад сабою дзве мэты, - гаворыць Лаўрынас Шэшкус. - Па-першае, вельмі хацелася, каб краіна ганарылася сваім новым пакаленнем. Гэта вялікая радасць, калі працуеш з разумнымі дзецьмі. Па-другое, мы хацелі прадставіць вучня і настаўніка як адну каманду. Сказаць, што мы разумныя дзякуючы нашым настаўнікам. Назіраючы за жыццём тых, хто перамагаў у нашай віктарыне, мы заўважылі, што яны вельмі актыўныя людзі па жыцці. Яны ўжо паспелі засвяціцца і заявіць пра сябе, як пра сапраўдных лідараў будучыні.

Калі прыручылі свінню?

...У невялікім павільёне "Мінск-Арэны дзе праходзяць здымкі новага праекта, горача. І не толькі ад працы батарэй: тут кіпяць інтэлектуальныя жарсці. У першым туры дзеткам трэба адказаць на 10 пытанняў: выбраць варыянт "так" ці "не".
Другі тур больш складаны, у ім трэба выбраць правільны варыянт адказу. Адно з пытанняў заставіла ўзгадваць школьную праграму і мяне: калі свіння стала свойскай жывёлай? Хто яго ведае.
Але ўсе шасцікласнікі даюць правільны варыянт адказу: 5 ст. да н.э. Вось дык веды!
У наступных турах - адмысловыя відэапытанні, далей - больш, можна самому выбіраць тэму.

Як расказала "Звяздзе" адна са сцэнарыстаў праекта Ларыса Есарція, усе пытанні не такія простыя, як можа падацца на першы погляд:
- Заўсёды трэба ўважліва чытаць пытанне, асабліва ў першым туры, дзе пытанні пачынаюцца са слоў: "Ці праўда, што..." Ты можаш ведаць правільны адказ, але заданне сфармулявана так, што націскаць трэба зусім іншую кнопку, - трэба быць пільным. Мы, у сваю чаргу, заўсёды ўлічваем карэктнасць пытання. Бо нават на самае, здавалася б, празрыстае пытанне пра самую высокую гару ў свеце можна адказаць па-рознаму - у залежнасці ад таго, як мы мераем: па ўзроўні мора, экватара ці інш. Двухсэнсоўнасці ў пытаннях стараемся пазбягаць.

А пераможцу - падарунак на ўсё жыццё!

Першасны адбор удзельнікаў праходзіў з дапамогай тэстаў. Як сцвярджаюць арганізатары, тэсты правялі ў школах ва ўсіх кутках Беларусі. І толькі лепшыя вучні трапілі ў студыю. Алег Аднакозаў з Гомеля прызнаўся, што ў сваёй школе ён вельмі актыўна ўдзельнічае ў тамтэйшай камандзе па інтэлектуальных гульнях, таму, калі кіраўнік іх гуртка расказаў пра новы праект на "ЛАДзе", ён ніколькі не вагаўся, каб разам з астатнімі падаць заяўку.
...Вядучы Юрый Круглік зачытвае пытанне, ідзе адлік часу - і пачынаюць дрыжаць каленкі. У зале ўсе напружана сочаць за ўдзельнікамі: ці паспеюць тыя прагаласаваць? Прытаілі дыханне настаўнікі, балельшчыкі на трыбунах на хвілю таксама суцішыліся. Адлік скончаны - камп'ютар паказвае правільны адказ - і паступова працоўныя месцы ўдзельнікаў афарбоўваюцца ў пэўны колер - у залежнасці ад таго, ці правільна адказала дзіця. На гэты раз ніхто не памыліўся. Апладысменты залы, усмешлівыя настаўнікі і шчаслівыя твары ўдзельнікаў.
- Мы вельмі доўга шукалі ідэю перадачы, - расказвае галоўны дырэктар тэлеканала "ЛАД" Сяргей Кухто. - Хацелася, каб гэта быў не проста тэлевізійны - праект, але каб ён меў статус нацыянальнага, маштабнага праекта. Каб яго маглі глядзець не толькі дзеці, але і дарослыя. Калі мы пабывалі на здымках літоўскай перадачы, то вырашылі, што Беларусі вельмі не хапае якраз такога праекта. Па-першае, ён аб'яднае дзяцей і настаўнікаў. А па-другое, дасць магчымасць дзецям, якія любяць вучыцца, заняць пэўнае месца ў грамадстве. Яшчэ адна задача, якую ставім перад сабою, - падняць прэстыж прафесіі настаўніка. Бо ад таго, як мы ставімся да прафесій, залежаць і маральныя арыенціры ў грамадстве.
А што за прызы? Згодна з умовамі, якія прадпісваюцца ў праекце, пераможцам забаронена рабіць каштоўныя падарункі. Але, як патлумачыў "Звяздзе" Сяргей Кухто, дзеці, якія перамогуць, без увагі не застануцца:
- Мы прынцыпова адмовіліся ад узнагароды за веды, на наш погляд гэта не зусім карэктна. Я не магу раскрыць да канца ўсе карты, але мы спадзяёмся, што прыдуманае намі ў якасці заахвочвання запомніцца надоўга. Гэта не камп'ютар, не мабільны тэлефон на год-два. Гэта не грошы. Гэта будзе падарунак на ўсё жыццё.
І пакуль беларускія школьнікі яшчэ думаюць над тым, ці ўдзельнічаць у тэлевіктарыне, літоўскі прадзюсар Лаўрынас Шэшкус падлівае масла ў агонь: у літоўскай перадачы пераможцамі аднолькава станавіліся як хлопцы, так і дзяўчаты (50 на 50). Шанцы перамагчы ёсць у кожнага. Хто не ўпусціць свой?

Ілья ЛАПАТО.

Умовы

Каб стаць удзельнікам новых выпускаў праграмы "Дзеці новага пакалення", дастаткова запоўніць анкету на сайце www.dnp.by альбо спампаваць яе для класа і даслаць на e-maіl: anketa@dnp.by. Таксама можна дасылаць анкеты на адрас: 220807, г.Мінск, вул. Макаёнка, 9. Тэлеканал "ЛАД" з паметкай "Дзеці новага пакалення".

Пытанні і заданні

Каментарый сцэнарысткі праекта Ларысы Есарціі:
- Усе пытанні зацвярджаюцца Міністэрствам адукацыі Беларусі. Абавязкова сочым за тым, каб яны адпавядалі адукацыйнаму ўзроўню школьнікаў. Пытанні праходзяць таксама праверку нашых шэф-рэдактараў, кансультацыю аказваюць і сцэнарысты з літоўскага боку, у якіх ужо ёсць вопыт. У большасці ж сваёй заданні датычаць геаграфіі, гісторыі, традыцый Беларусі. Бо, як высвятляецца, дзеці не ведаюць, што за кветкі змешчаны на нашым гербе: канюшыны і васількоў ці канюшыны і льну. Будзе пытанне пра тое, хто напісаў беларускі гімн, пытанні пра нацыянальную кухню беларусаў.