Радыёконкурс "Маладыя таленты Беларусі"


Радыёконкурс "Маладыя таленты Беларусі 2020"

Афіцыйны тэлеграм-акаўнт Першага нацыянальнага канала Беларускага радыё аб’явіў вынікі IX Рэспубліканскага творчага радыёконкурсу "Маладыя таленты Беларусі", апублікаваўшы імёны ўладальнікаў Гран-пры, лаўрэатаў усіх шасці намінацый і дыпламантаў праекта.  

Нагадаем, сёлета праект Першага нацыянальнага праводзіўся пад знакам юбілейнай даты - 75-годдзя Вялікай Перамогі, і, згодна з умовамі конкурсу, фіналісты намінацыі "Эстрадны вакал" выконвалі беларускія творы, прысвечаныя гэтай важнай падзеі. Усяго ў адрас арганізатараў конкурсу "Маладыя таленты Беларусі" паступіла каля 400 заявак, у фінал прайшлі 157 канкурсантаў - 124 сольныя выканаўцы і 33 калектывы. 

Фінальны тур конкурсу праходзіў у відэафармаце. Рашэннем прафесійнага журы на чале са старшынёй - народным артыстам Беларусі Леанідам Захлеўным - выбраны самыя яркія, шчырыя і таленавітыя выступленні ўдзельнікаў праекта. 

Так, уладальнікамі Гран-пры радыёконкурсу "Маладыя таленты Беларусі" сталі Анастасія Жабко (намінацыя "Эстрадны вакал"), Аляксей Іардасопаль (намінацыя "Інструментальная музыка") і Улада Філіповіч (намінацыя "Спадчына"). 

Першыя месцы ў намінацыі "Эстрадны вакал. Салісты" ў трох узроставых катэгорыях занялі Марыям Абдэлькадэр, Алена Цітова, Шчарбіцкая Лада. Першае месца ў намінацыі "Эстрадны вакал. Ансамблі" дасталася вакальнаму трыа DivVoice.

У намінацыі "Інструментальная музыка. Сола" першыя месцы ў трох узроставых катэгорыях узялі Янучок Дзмітрый (фартэпіяна), Ксенія Сяліцкая (саксафон) і Ілья Кокін (домра). У намінацыі "Інструментальная музыка. Ансамблі" дыплом лаўрэата першай ступені заслужыў інструментальны дуэт "Натхненне".

Лаўрэатамі першай ступені ў фальклорнай намінацыі "Спадчына. Сола" ў трох узроставых катэгорыях названыя Мілана Заікіна, Аліса Доўнар і Ганна Шэмет. У намінацыі "Спадчына. Ансамблі" дыплом лаўрэата першай ступені атрымае ансамбль народнай музыкі "Верас".