Сотні ахвяр. Колькасць загінуўшых за гэтыя дні проста не ўкладваецца ў галаве, калі ўлічыць, што гаворка ідзе наконт краіны з самымі папулярнымі ў свеце курортамі. Пасля затрымання Мурсі наступнай кропляй масла ў агонь можа стаць прапанова новых уладаў забараніць дзейнасць ісламісцкага руху Браты-мусульмане, як гэта было пры Мубараку. На фоне напружання, якое нарастае, замежныя краіны адклікаюць сваіх грамадзян ад берагоў Чырвонага мора. Беларускае Міністэрства замежных спраў рэкамендуе ўстрымацца ад паездак у Егіпет. Калі пуцёўку ўжо купілі, можаце вярнуць з поўным правам. Чакаць, што краіна пірамід хутка ўспомніць пра турыстаў, пакуль не прыходзіцца. На старажытных вуліцах Каіра сёння ніхто не спяшаецца ісці на кампраміс.
Расказвае Аляксандра Пінчук.
Падраздзяленні егіпецкага МУС сумесна з армейскімі часцямі раніцай у сераду, 14 жніўня, пачалі разгон двух палатачных лагераў прыхільнікаў экс-прэзідэнта Махамеда Мурсі ў Каіры. Паліцыя выкарыстоўвала гранаты са слёзатачывым газам.
Пазней сутыкненні перакінуліся і на іншыя правінцыі.
Ісламісты сцвярджаюць, што сілавікі і армія прымяняюць агнястрэльную зброю. У Каіры Браты-мусульмане здымаюць інсцэніроўкі з забітымі так, што адзін і той жа чалавек апазнаецца ў розных частках горада.
Пасля зачысткі ўлады Егіпта ўвялі рэжым надзвычайнага становішча тэрмінам на месяц і каменданцкую гадзіну. Тыя, хто не будзе яе выконваць, трапяць у турму. На асобных вуліцах Каіра за парадкам сочаць самі жыхары. Народнае апалчэнне ў краіне, дзе вось ужо без малога тры гады аб спакоі і стабільнасці прыходзіцца толькі марыць, збіраецца не першы раз.
15 жніўня масавыя беспарадкі распаўсюдзіліся і на курортную зону. Ахвярамі сутыкненняў, пачатых падчас зносу палатачных лагераў, сталі, паводле афіцыйных звестак, звыш 600 чалавек. Параненыя тысячы.
У чацвер вечарам Савет Бяспекі ААН правёў экстранную нараду па ініцыятыве Францыі, Брытаніі і Аўстраліі. Члены Саўбеза заклікалі ўсе бакі егіпецкага канфлікту да максімальнай стрыманасці і заявілі аб неабходнасці спыніць кровапраліцце.
Магутную егіпецкую армію нездарма называюць гарантам бяспекі іншых арабскіх краін. У іх ліку невялікія нафтавыя дзяржавы Персідскага заліва і ўзбярэжжа Аравійскага паўвострава ўздоўж Чырвонага мора. Крызіс у Егіпце здольны паўплываць на пастаўкі нафты з гэтага рэгіёну, калі будзе блакіраваны Суэцкі канал. Егіпцяне запасаюцца гаручым. Заводы стаяць, паток турыстаў змяншаецца. Беларусь, Расія, Германія, Вялікабрытанія, ЗША і Польшча рэкамендуюць грамадзянам устрымацца ад паездак у Егіпет.
Сапраўдны мусульманін ніколі не адкрые агонь з мячэці. Менавіта так ісламісты дзейнічалі ў суботу, 17 жніўня, калі спецслужбы акружылі мячэць Аль-Фатх на каірскай плошчы Рамзеса. У Егіпце сутыкненні адбываюцца не толькі на палітычнай, але і на рэлігійнай глебе. У Суэце і Александрыі спаленыя дзясяткі хрысціянскіх цэркваў. У краіне арудуюць тысячы марадзёраў. Браты-мусульмане заклікаюць прадоўжыць пратэсты і абяцаюць выводзіць людзей на вуліцы штодня ўвесь наступны тыдзень. Краіна пірамід расколатая, саступаць ніхто не жадае, а кропка прымірэння засталася ў мінулым.
