Правядзенне саміту і намаганні кіраўніцтва дзвюх краін, накіраваныя на ўмацаванне міру і стабільнасці ў рэгіёне, вітае Беларусь. З такой заявай выступіла МЗС нашай краіны. Пазітыўна мірныя перамовы паміж Кім Чэн Ынам і Мун Чжэ Інам ацанілі ЗША, Кітай, Расія, краіны ЕС, а таксама ААН і НАТА. Сустрэча лідараў сапраўды стала сапраўдным прарывам - бо яшчэ год таму дзве дзяржавы знаходзіліся на грані вайны. Сёння ж прэзідэнты правялі прадуктыўныя перамовы, разам пасадзілі дрэва, пагутарылі сам-насам і развіталіся, як добрыя сябры. Палітолагі такога развіцця падзей не чакалі - так блізка да міру Поўнач і Поўдзень не былі з моманту заканчэння вайны на паўвостраве. Пацяпленне адбілася і на простых грамадзянах - у Сеуле людзі выстройваюцца ў чэргі ля рэстаранаў паўночнакарэйскай кухні, каб паспрабаваць любімую страву Кім Чэн Ына, якой палітык частаваў паўднёвакарэйскага калегу. Больш падрабязна аб выніках саміту Юрый Казлоў.
Апошнія 68 гадоў Паўночная і Паўднёвая Карэі фармальна знаходзяцца ў стане вайны. У 1953-м пасля завяршэння ўзброенага канфлікту на паўвостраве бакі так і не падпісалі паўнавартасную мірную дамову. Замест яе заключылі перамір'е. Дакумент, які прыпыняў баявыя дзеянні, быў падпісаны ў вёсцы Пханмунджом. Яна знаходзіцца роўна на 38-й паралелі, якая падзяляе Карэйскі паўвостраў на дзве краіны. Пасярод населенага пункта праходзіць невялікі бетонавы бардзюр - гэта і ёсць мяжа.
Сёння ўпершыню за шэсць з паловай дзесяцігоддзяў гэтую зусім не сімвалічную мяжу пераступіў лідар КНДР. Кім Чэн Ын прыбыў у Пханмунджом на міжкарэйскі саміт па ўрэгуляванні сітуацыі на паўвостраве. З паўднёвага боку яго цяпло прывітаў Прэзідэнт Рэспублікі Карэя Мун Чжэ Ін. Поціск рукі кіраўнікоў дзяржаў доўжыўся прыкладна паўхвіліны. Пры гэтым Кім Чэн Ын практычна адразу парушыў пратакол, прапанаваўшы калегу на секундачку наведаць Паўночную Карэю.
Гістарычны саміт пачаўся з пышнай цырымоніі з нацыянальным каларытам. Нягледзячы на розныя ідэалогіі, культурныя карані ў Поўначы і Поўдня агульныя.
Асноўныя пытанні парадку дня - ядзернае раззбраенне і аднаўленне эканамічнага супрацоўніцтва. Пры гэтым усе тэмы былі дбайна прапрацаваныя загадзя, таму перамовы прайшлі без сюрпрызаў, і гэта стала галоўнай нечаканасцю. Аб выніках саміту лідары паведамілі падчас сумеснага брыфінгу.
Мун Чжэ Ін, Прэзідэнт Рэспублікі Карэя:
"З гэтага часу паміж нашымі краінамі не будзе ніякай варожасці ні на сушы, ні ў моры, ні ў паветры. Мы прымем фундаментальныя меры супраць выпадковых сутыкненняў. Дэмілітарызаваная зона, якая перасякае Карэйскі паўвостраў, стане рэальнай зонай міру. Мы таксама маем намер пазначыць такую зону ў марскіх водах, каб прадухіліць выпадковыя ваенныя сутыкненні і гарантаваць бяспеку рыбакоў".
Кім Чэн Ын, Старшыня Дзяржсавета КНДР:
"Стоячы тут, тварам у твар з Вамі, я сэрцам адчуваю, што Паўночная і Паўднёвая Карэі - не суседзі, а адна сям'я. Мы не павінны варагаваць, мы павінны аб'яднацца. Калі б людзі з Поўначы і Поўдня маглі таксама вольна перасякаць мяжу, як і мы сёння, вёска Пханмунджом ператварылася б з сімвала раз'яднання ў сімвал міру".
Бадай, галоўны вынік перамоў - дэкларацыя палітычнай волі ў дачыненні мірнай дамовы. Яе плануюць падпісаць да канца года. У маі палітыкі сустрэнуцца яшчэ раз, каб пачаць працу па поўнай дэнуклеарызацыі паўвострава. Дарэчы, падчас саміту Кім Чэн Ын паабяцаў Мун Чжэ Іну больш не будзіць яго ракетнымі пускамі. Яны, як правіла, праводзіліся раніцай і вымушалі паўднёвакарэйскага прэзідэнта і яго апарат паднімацца па трывозе.
У якасці сімвалічнага жэсту Кім Чэн Ын і Мун Чжэ Ін пасадзілі хвою на дэмаркацыйнай лініі. Яе карані засыпалі глебай, прывезенай з розных куткоў краіны, і палілі вадой з рэк, якія працякаюць праз Сеул і Пхеньян. Падчас шпацыру па Пханмунджому ў перапынку паміж пасяджэннямі двум лідарам атрымалася адасобіцца ў альтанцы і пагаварыць сам-насам. Без журналістаў.
Увогуле саміт у Пханмунджоме прадоўжыўся 12 гадзін. Кім Чэн Ын пакінуў тэрыторыю Паўднёвай Карэі на чорным лімузіне. Побач з машынай бег тузін целаахоўнікаў.
Зараз лідару КНДР трэба будзе падрыхтавацца да сустрэчы з амерыканскім прэзідэнтам Дональдам Трампам. Яна можа прайсці ў канцы мая - пачатку чэрвеня, і менавіта гэтую сустрэчу эксперты называюць ключавой у справе мірнага ўрэгулявання карэйскага крызісу.
