Вірус новага тыпу пранік на тэрыторыю ўжо 23 дзяржаў свету

Першыя два выпадкі зафіксаваныя сёння на тэрыторыі Расіі. Гаворка ідзе аб грамадзянах Кітая. Сёння ж расійскі ўрад абвясціў аб рашэнні пачаць эвакуацыю сваіх грамадзян з Ухані і Хубэя. Італія ўвяла рэжым надзвычайнай сітуацыі, а ўлады Сінгапура забаранілі ўезд тым, хто знаходзіўся ў Кітаі апошнія 14 сутак. У Тайландзе і Японіі зафіксаваныя факты заражэння ўсярэдзіне краін, а ў Германіі захварэла дзіця. Для ФРГ - гэта ўжо шосты па ліку выпадак. Еўрасаюз запускае экстранную праграму даследаванняў каранавіруса на 10 мільёнаў еўра. Акцэнт будзе рабіцца і на процідзеянне яго распаўсюджанню. Напярэдадні Сусветная арганізацыя аховы здароўя прызнала ўспышку інфекцыі ў Кітаі надзвычайнай сітуацыяй міжнароднага маштабу. Пры гэтым спецыялісты САЗ высока ацанілі меры, што прымаюцца Пекінам для стрымлівання распаўсюджання захворвання. Нягледзячы на тое, што агульная колькасць заражаных набліжаецца да 10 тысяч, эксперты адзначаюць, што колькасць захворванняў на каранавірус у Кітаі пачала зніжацца.