Ва Украіне стартавалі прэзідэнцкія выбары. Два выбарчыя ўчасткі працуюць і ў нашай краіне

Увага СМІ сёння прыкавана да Украіны. Літаральна гадзіну таму там стартавалі прэзідэнцкія выбары. Кандыдатаў  39. Апытанні сацыёлагаў прадказваюць лідарства акцёру Уладзіміру Зяленскаму. Следам ідуць дзеючы прэзідэнт Пётр Парашэнка і лідар "Батькивщины" Юлія Цімашэнка. За межамі краіны для галасавання сфарміраваны 101 выбарчы ўчастак. Першым адкрыўся той, што ў аўстралійскай Канберы. 2 ужо працуюць і ў Беларусі. У пасольстве ў Мінску і ў консульстве ў Брэсце аддаць свой голас можна да 8 вечара. Ва Украіне назіраюць за выбарчым працэсам больш як 2 тысячы прадстаўнікоў з 16 краін і 15 міжнародных арганізацый. Калі ніводнаму кандыдату не ўдасца заручыцца галасамі абсалютнай большасці выбаршчыкаў, будзе абвешчаны 2 тур. Ён можа адбыцца 21 красавіка.