Чарговы дзень прынёс новыя неспакойныя навіны. На гэты раз чырвоным колерам на геапалітычнай карце планеты пазначаная Турцыя. Там мінулай ноччу была ўчынена спроба дзяржаўнага перавароту. Група вайскоўцаў, у тым ліку вышэйшае кіраўніцтва Узброеных сіл, узяла ў заложнікі начальніка Генштаба і паспрабавала зрынуць урад краіны. На вуліцы Анкары і Стамбула вывелі танкі, гарады абстрэльвалі з паветра. Прыхільнікі прэзідэнта Эрдагана спрабавалі перашкодзіць путчыстам. Як вынік - каля трохсот загінуўшых і сотні параненых. Спроба ваеннага перавароту правалілася, заяўляюць улады краіны. У Анкары, Стамбуле і іншых гарадах працягваюцца арышты тых, хто мае дачыненне да ўзброенага мецяжу. Паступаюць паведамленні аб сутычках - яны, зрэшты, носяць лакальны характар і непараўнальныя з тым, што адбывалася ў Турцыі ўначы.
Прэзідэнт Беларусі Аляксандр Лукашэнка накіраваў пасланне Прэзідэнту Турэцкай Рэспублікі Рэджэпу Таіпу Эрдагану ў сувязі са спробай ваеннага перавароту ў гэтай краіне. У пасланні выказваюцца словы падтрымкі і салідарнасці з легітымнай уладай Турцыі. Нашы карэспандэнты паспрабавалі аднавіць храналогію падзей мінулых сутак.
Расказвае Юрый Казлоў. Навіны аб спробе ваеннага перавароту ў Турцыі сталі для многіх громам сярод яснага неба. Усю ноч свет у напружанні сачыў за паведамленнямі інфармагенцтваў і карыстальнікаў сацсетак, якія знаходзіліся на месцы падзей.
23:30 - першая інфармацыя пра тое, што ў Турцыі адбыўся пераварот, з'явілася прыкладна за паўгадзіны да паўночы па мясцовым часе, ён супадае з мінскім. Адразу некалькі ўплывовых СМІ паведамілі, што ўлада ў краіне поўнасцю перайшла да вайскоўцаў. У рабоце нацыянальнага сегмента Інтэрнэту назіраюцца збоі.
23:50 - становіцца вядома, што абодва масты, якія злучаюць еўрапейскую і азіяцкую часткі Стамбула, занятыя танкамі. Салдаты ўвайшлі ў штаб-кватэру дзяржаўнай тэлерадыёкампаніі ў Анкары. Мясцовыя тэлеканалы пачынаюць трансліряваць прагноз надвор'я. У чыіх руках знаходзіцца ўлада ў краіне, незразумела. У аэрапорт сталіцы ўваходзяць танкі. Паветраная гавань закрываецца. Вылеты адмяняюць.
Поўнач - над Анкарой лятаюць знішчальнікі. Урад уводзіць у краіне каменданцкую гадзіну, армія - ваеннае становішча. Нацыянальнае тэлебачанне вяртаецца ў эфір - вядучая навін зачытвае заяву вайскоўцаў.
З афіцыйнай заявай выступае і прэм'ер-міністр Турцыі Біналы Йылдырым. Паводле яго слоў, тое, што адбываецца ў краіне, не пераварот, а толькі яго спроба, якая будзе пакараная па ўсёй строгасці закона. У эфіры CNN Turk з'яўляецца і прэзідэнт краіны Рэджэп Таіп Эрдаган. Кіраўнік дзяржавы звяртаецца да народа праз мабільны дадатак FaceTime і заклікае прыхільнікаў выходзіць на вуліцы і перашкаджаць дзеянням мяцежнікаў. Такія ж просьбы раздаюцца праз гучнагаварыцелі з турэцкіх мінарэтаў. Людзі адказваюць на заклікі. Жыхары Анкары і Стамбула перакрываюць дарогу танкам і скандзіруюць: "Вайскоўцы, сыходьце!"
Гадзіна ночы. Раздаецца стральба ў аэрапорце Стамбула. У Анкары чуваць магутны выбух. Горад абстрэльваюць ваенныя верталёты. Танкі акружаюць парламент. З паветра на будынак скідваюць бомбу.
Вайскоўцы паведамляюць, што ў іх у заложніках знаходзіцца начальнік Генштаба Хулусі Акара, а прэзідэнт Эрдаган уцёк з краіны і просіць сховішча ў Германіі.
Дзве гадзіны ночы. Духавенства і буйныя партыі, у тым ліку апазіцыйныя, выступаюць супраць перавароту. За захаванне канстытуцыйнага ладу ў Турцыі выказваюцца прэзідэнт ЗША Барак Абама і нямецкі ўрад. Словы падтрымкі і салідарнасці з легітымнай уладай Рэджэпу Таіпу Эрдагану накіраваў і Аляксандр Лукашэнка. Тым часам у Стамбуле вайскоўцы адкрываюць агонь па натоўпе праўрадавых дэманстрантаў. Трагедыя адбываецца на перакрытым мосце цераз Басфор. Ёсць загінуўшыя і параненыя.
Праз гадзіну міністр абароны краіны заяўляе, што ў перавароце ўдзельнічае невялікая колькасць вайскоўцаў. Большая частка арміі па-ранейшаму падпарадкоўваецца галоўнакамандуючаму. З'яўляюцца першыя паведамленні аб тым, што мяцеж падаўлены.
06:00 - перастрэлкі ў Анкары і Стамбуле працягваюцца да раніцы. Паралельна праходзяць арышты тых, хто датычны да перавароту. СМІ транслююць кадры з моста цераз Басфор, па якім вайскоўцы ідуць з узнятымі рукамі. Усяго арыштаваныя каля трох тысяч чалавек. Сярод іх пяць генералаў і каля 30-ці палкоўнікаў.
Штат Пенсільванія турэцкі прэзідэнт згадвае нездарма. Там жыве грамадскі дзеяч, былы імам і прапаведнік Фетхулах Гюлен - Анкара лічыць яго галоўным ідэолагам падзей гэтай ночы. У 2008 годзе Гюлен быў названы самым уплывовым інтэлектуалам свету паводле версіі Foreign Policy, а часопіс Time ўключыў яго ў спіс ста самых уплывовых людзей свету. Нягледзячы на заяву аб падаўленні мецяжу, на працягу дня ў Анкары і Стамбуле адбываліся лакальныя сутычкі паміж лаялістамі і путчыстамі.
Пасля поўдня невялікая група мяцежнікаў выкрала галоўнакамандуючага ВМС краіны і захапіла ваенны фрэгат.