Ва ўчыненні самага буйнога ў егіпецкай гісторыі тэракта падазраюць баевікоў з "Ісламскай дзяржавы". Радыкалы, якія напярэдадні атакавалі мячэць у цэнтры правінцыі Паўночны Сінай, трымалі пры сабе флаг тэрарыстычнай групоўкі, паведаміў сёння генеральны пракурор Егіпта. Пры гэтым ні адна з дзеючых на тэрыторыі краіны экстрэмісцкіх груповак так і не ўзяла на сябе адказнасць за здарэнне. Нагадаем, напярэдадні ў горадзе Эль-Арышта былі забітыя звыш 300 чалавек. Ісламскія баевікі актывізаваліся на паўвостраве 4 гады таму, калі вайскоўцамі былі адхілены ад улады ў Егіпце прадстаўнікі рэлігійнай арганізацыі "Браты-мусульмане".
Дыаа Рашван, кіраўнік інфармацыйнай службы ўрада Егіпта: "Я звяртаюся да "Братоў-мусульман". Калі ў іх хопіць адвагі назваць тэрарыстамі тых, хто ўчыняе такія злачынствы: забівае людзей, забівае хрысціян, нападае на цэрквы, нападае на мячэці, калі ў іх хопіць адвагі назваць гэта тэрактам, тады я буду перакананы, што "Браты-мусульмане" невінаватыя".
Зараз улады Егіпта праводзяць маштабную контртэрарыстычную аперацыю. Яна атрымала кодавую назву "Помста за пакутнікаў". Да высочвання груп тэрарыстаў прыцягнуты авіяцыя і беспілотнікі. Паводле інфармацыі вайскоўцаў, знішчаны 30 баевікоў.
Абдул Фатах Ас-Сісі, Прэзідэнт Егіпта: "Існуе жахлівая тэрарыстычная змова па знішчэнні астатняй часткі нашага рэгіёна, і мы з гэтым напрамую сутыкаемся. Але мы не адступім і ніколі не адмовімся ад барацьбы з тэрарызмам. Такія атакі толькі дадаюць нам рашучасці супрацьстаяць гэтаму злу".
Шэраг экспертаў звязвае напад на мячэць у пятніцу з серыяй стратэгічных паражэнняў "Ісламскай дзяржавы" ў Сірыі. Не выключана, што тэрарысты спрабуюць выратаваць безнадзейнае становішча за кошт дэстабілізацыі становішча і запалохвання лаяльных ураду сінайскіх мусульман. У краіне аб’яўлена 3-дзённая жалоба.
