За 9 дзён да інаўгурацыі абранага прэзідэнта ЗША ў Нью-Ёрку адбылася першая вялікая прэс-канферэнцыя Дональда Трампа. Будучы кіраўнік Белага дома падрабязна расказаў пра свае планы ў першыя дні працы на прэзідэнцкай пасадзе. У прыватнасці, ён гатовы адмяніць праграму абавязковага медыцынскага страхавання Obama-Care і пачаць будаваць сцяну на мяжы з Мексікай. Аднак большую частку часу Дональд Трамп прысвяціў адказам на пытанні журналістаў пра адносіны з Расіяй. Галоўны тэзіс - нармалізацыя. Закранулі і тэму працы амерыканскіх СМІ, якія альбо скажаюць факты, альбо публікуюць ілжывыя звесткі. Самыя гарачыя дэбаты выклікаў нейкі "кампрамат Масквы на Трампа". Прадоўжыць Аляксандра Пінчук.
Дональд Трамп на прэс-канферэнцыі катэгарычна адмёў усе паведамленні аб тым, што ў Масквы на яго нібы ёсць кампрамат, уступіўшы ў жорсткую сварку з адным з журналістаў тэлеканала Сі-эн-эн.
Абраны прэзідэнт Злучаных Штатаў Амерыкі абяцае, што пры ім Расія пачне паважаць ЗША як ніколі.
Дональд Трамп, абраны прэзідэнт ЗША: "Калі Пуціну падабаецца Дональд Трамп, то гэта перавага, а не недахоп, паколькі ў нас жудасныя адносіны з Расіяй. Расія можа дапамагчы нам змагацца супраць ІДІЛ. Я не ведаю, ці змагу паладзіць з Пуціным, але спадзяюся на гэта. На гэта ёсць добрыя шанцы. Але нават калі ў мяне не атрымаецца, вы праўда лічыце, што Клінтан была б больш цвёрдай з Пуціным, чым я? У гэтым пакоі ёсць хтосьці, хто ў гэта верыць?"
Дарэчы, пра Расію гаварылі ў гэты час і ў камітэце сената па міжнародных адносінах, дзе кандыдат на пасаду дзяржсакратара ЗША Рэкс Тылерсан адзначыў, што неэфектыўныя санкцыі горш, чым наогул ніякіх.
Рэкс Тылерсан, кандыдат на пасаду дзяржсакратара ЗША: "Нам трэба перагледзець свае адносіны да Расіі як да праціўніка ва ўсіх сферах. Мы можам дзесьці сапернічаць, а ў чымсьці супрацоўнічаць. Гэта рэальна, бо менавіта такія адносіны ў нас зараз з Кітаем".
Яшчэ адным з тэзісаў прэс-канферэнцыі Трампа стала адмена Obama-Care. Замест яе Дональд Трамп гатовы прапанаваць новы план сістэмы аховы здароўя. Сенат ЗША сёння прагаласаваў за адмену рэформы Абамы. 51 сенатар супраць 48-мі. Зараз пастанову аб пачатку працэдуры адмены павінна будзе разгледзець Палата прадстаўнікоў кангрэса.
Майк Энці, член бюджэтнага камітэта сената ЗША: "Obama-Care негатыўна паўплывала на жыццё мільёнаў амерыканцаў. Сённяшняе рашэнне дазволіць нам закласці падмурак для новых рэформаў, дазволіць забяспечыць медыцынскай дапамогай тых, хто да гэтага не меў на гэта права".
Тым часам ЗША пачнуць будаўніцтва сцяны на мяжы з Мексікай.
Дональд Трамп, абраны прэзідэнт ЗША: "Мы збіраемся пабудаваць сцяну. Я мог бы пачакаць паўтара года, пакуль мы не завершым перамовы з Мексікай, якія я пачну неадкладна пасля ўступлення на пасаду, але я не хачу чакаць. Мексіка ў некаторым выглядзе - і тут ёсць мноства розных формаў - пакрые нам выдаткі па будаўніцтве сцяны".
Праўда, прэзідэнт Мексікі Энрыке Пенья Ньета з Трампам катэгарычна не згодны.
Энрыке Пенья Ньета, прэзідэнт Мексікі: "У нас ёсць рознагалоссі з ЗША, напрыклад, сцяна на мяжы, за якую мы не будзем плаціць, але мы збіраемся наладжваць добрасуседскія адносіны. У прыватнасці, Мексіка будзе ўкладваць сродкі ў рэалізацыю праектаў па ўзмацненні мераў бяспекі на мяжы".
Дональд Трамп даручыў амерыканскай разведцы распрацаваць мерапрыемствы па абароне ад кібератак. За 90 дзён, па яго словах, будзе гатовы новы пашыраны даклад аб хакерскіх атаках на Злучаныя Штаты, а таксама мерах процідзеяння ім. Кіраванне бізнес-імперыяй мільярдэра пяройдзе да яго сыноў - Дона і Эрыка.
Дональд Трамп, абраны прэзідэнт ЗША: "Усім дзякуй! Гэта ўсё! Каб вы зразумелі, вось гэтыя паперы - гэта толькі частка тых кампаній, якімі я валодаю і якія я перадаю ў траст, каб імі кіравалі мае сыны. І я спадзяюся, што праз 8 гадоў я вярнуся і скажу: "Выдатная праца, хлопцы!" Ну а калі яны напартачаць, то я скажу: "Вы звольненыя!" Усім да пабачэння"!
