У штаб-кватэры ААН у Нью-Ёрку прайшоў саміт па бежанцах і мігрантах. Яго вынік - прыняцце дэкларацыі па ўрэгуляванні праблемы. Новы дакумент утрымоўвае меры па абароне асоб, вымушаных ратавацца ад ваенных канфліктаў, насілля, беднаты і голаду. У прыватнасці, 193 дзяржавы ААН узялі на сябе абавязацельствы па паляпшэнні ўмоў жыцця ў краінах, адкуль бягуць мігранты.
Ян Эліясон, намеснік генеральнага сакратара ААН: "Усе прызнаюць нагрузку на тыя краіны, якія прымаюць вялікую колькасць бежанцаў. Падчас саміту дзяржавы - члены ААН падзялілі планы аб пашырэнні фінансавай дапамогі гэтым краінам. Новыя фінансавыя механізмы накіраваныя на ўзмацненне падтрымкі гэтых краін і саміх перасяленцаў. Шматлікія краіны гатовыя прадаставіць мігрантам новыя тэрыторыі для рассялення, а таксама гатовыя разгледзець альтэрнатыўныя шляхі прыёму бежанцаў. Разам мы зможам сфарміраваць новую будучыню, будучыню, у якой мігранты і бежанцы, краіны, якія прымаюць, і суполкі могуць жыць разам у гармоніі, дабрабыце і ўзаемнай павазе".
Выступаючы на пасяджэнні высокага ўзроўню Генасамблеі, прысвечанай праблеме мігрантаў, кіраўнік МЗС Беларусі адзначыў, што асноўная маса бежанцаў - вынік узброеных канфліктаў. Уладзімір Макей падкрэсліў, што прынцып "размеркавання адказнасці", які актыўна прасоўваецца некаторымі краінамі, павінен датычыцца ў першую чаргу тых, хто стаіць за распальваннем канфліктаў.
