Гэтай узнагароды чакае літаральна ўвесь свет кінаіндустрыі. У Лос-Анджэлесе ў тэатры "Долбі" напярэдадні адбылася цырымонія ўручэння прэміі "Оскар". Як заўсёды, яна запомніцца яркімі ўборамі чырвонай дывановай дарожкі, палітычнымі жартамі, сюрпрызамі, але ўпершыню без вядучага. Аб'яўляць пераможцаў даручылі розным акцёрам і спартсменам. Вядома, не абышлося і без казусных момантаў, што, мабыць, толькі ўзмацняе цікавасць публікі да гэтай цырымоніі. Хто атрымаў запаветную статуэтку, распавядзе Аляксандра Пінчук.
Хіт легендарнай групы Queen на сцэне тэатра "Долбі" выканалі гітарыст Браян Мэй, барабаншчык Роджэр Тэйлар і спявак Адам Ламберт. А акцёр Рамі Малек атрымаў прэмію "Оскар" у намінацыі "Лепшы акцёр". Менавіта ён сыграў Мерк’юры ў "Багемскай рапсодыі".
Гэта была першая намінацыя на "Оскар" у кар'еры 37-гадовага акцёра. Атрымаўшы залатую статуэтку, ён так разнерваваўся, што ўпаў са сцэны. Лепшай актрысай прызнана брытанка Алівія Колман. Яна сыграла ролю каралевы Ганны ў карціне "Фаварытка".
Драма грэчаскага рэжысёра Ёргаса Лантымаса здымалася на плёнку пры натуральным асвятленні. А аператар фільма Робі Раян не прысутнічаў на мантажы. Ён і падумаць не мог, што фільм закончыцца аптычным накладаннем кадраў.
Сёлета ў кожнага лаўрэата было ўсяго 90 секунд на тое, каб зайсці на сцэну і сказаць словы. З-за рэкордна нізкіх рэйтынгаў трансляцыю скарацілі да 3 гадзін. І спачатку некаторыя статуэткі хацелі ўручаць падчас перапынкаў на рэкламу, але на гэта ніхто так і не адважыўся.
Мабыць, ні адзін з "Оскараў" да гэтага года так не ўражваў уборамі на чырвонай дывановай дарожцы. А зорка двух серыялаў Раяна Мэрфі (Pose і American Horror Story) Білі Портэр прыйшоў на мерапрыемства адначасова ў смокінгу і ў сукенцы.
Галоўная кінаўзнагарода года - "Оскар" за лепшы фільм - у "Зялёнай кнігі" амерыканскага рэжысёра Пітэра Фарэлі.
Стужку адзначылі таксама ў намінацыі "Лепшы арыгінальны сцэнарый", а Махершал Алі, які сыграў у ёй (ён вядомы па серыяле "Картачны домік”) узнагароджаны як лепшы акцёр другога плана. Камедыйная драма апавядае аб падарожжы па поўдні Злучаных Штатаў чарнаскурага джазавага піяніста з вадзіцелем. Яна заснавана на рэальных падзеях 60-х гадоў мінулага стагоддзя.
Цырымонія ўручэння ўзнагарод Амерыканскай кінаакадэміі ўпершыню за шмат гадоў праходзіла без вядучага. Замест гэтага яна была запоўнена стыльнымі музычнымі нумарамі.
А адным з самых яркіх момантаў стала эмацыянальнае выступленне Лэдзі Гага і Брэдлі Купера. Дарэчы, за песню Shallow спявачка сёння атрымала свой першы "Оскар".
