Ля будынка Вярхоўнай рады працягваецца мітынг, арганізаваны Міхаілам Саакашвілі. На плошчы перад парламентам Украіны сабраліся каля паўтары тысячы чалавек. Актывісты патрабуюць прыняцця Радай закона аб імпічменце і адстаўкі кіраўніцтва генпракуратуры і СБУ.
Нагадаем, сёння раніцай у кватэры Саакашвілі прайшлі вобыскі, сам жа палітык залез на дах свайго дома і пагражаў саскочыць уніз. Сваіх пагроз ён не стрымаў і быў эвакуіраваны праваахоўнікамі. У гэты час прыхільнікі палітыка, якія прыбылі на месца падзей, ачапілі аўтамабіль спецслужб і адбілі свайго лідара ў байцоў СБУ.
Падставай для затрымання Міхаіла Саакашвілі стаў 256-ы артыкул Крымінальнага кодэкса Украіны "Садзейнічанне ўдзельнікам злачынных арганізацый і ўтойванне іх злачыннай дзейнасці". У якасці доказу віны палітыка, украінская пракуратура апублікавала запісы яго тэлефонных размоў з алігархам Курчанкам, які, нібыта, спрабуе ўзяць пад кантроль палітычныя працэсы ва Украіне па ўказанні збеглага прэзідэнта Януковіча.
Юрый Луцэнка, генеральны пракурор Украіны: "Асоба, набліжаная да Саакашвілі, а менавіта Северыён Дангадзэ, са згоды Саакашвілі звярнуўся да Курчанкі, які хаваецца ў горадзе Масква, з прапановай фінансаваць дзейнасць Саакашвілі ў абмен на інтарэсы членаў арганізаванай злачыннай групоўкі. Мы зафіксавалі атрыманне з расійскага боку каля паўмільёна долараў ЗША. Прыкладна палову сумы канфіскавалі ў Дангадзэ пад кантролем спецслужб".
Зрэшты, сам Саакашвілі назваў абвінавачанні супраць яго нахабнай хлуснёй.
