Сёння галоўная міжнародная тэма сусветных навінавых выданняў - інаўгурацыя Дональда Трампа. Урачыстыя мерапрыемствы стартавалі з традыцыйнага наведвання набажэнства ў царкве Святога Іаана насупраць Белага дома. У ім прынялі ўдзел абраны прэзідэнт і абраны віцэ-прэзідэнт Майкл Пенс з сем'ямі, а таксама члены новага кабінета разам са сваякамі і сябрамі. Затым яны заехалі ў Белы дом на чаяванне і пазней накіруюцца да Капітолія, дзе літаральна праз гадзіну пачнецца цырымонія інаўгурацыі.
СМІ адзначаюць, што Дональд Трамп знаходзіцца ў выдатным настроі. Мяркуючы па апошніх публічных выступленнях, ён адчувае і сваю каманду сапраўднымі пераможцамі. Напрыклад, з такой трыумфальнай і аптымістычнай заявай Трамп выступіў напярэдадні падчас вячэры пры свечках са спонсарамі яго перадвыбарнай кампаніі.
Дональд Трамп, абраны Прэзідэнт ЗША: "Наступны раз праз 4 гады мы выйграем у лепшых традыцыях мінулага. Гэта будзе перамога тых, хто так добра папрацаваў, што ўсе зразумелі, што гэта было сапраўды выдатна. Таму што наш Кабінет міністраў будзе самым лепшым. І вы ўсе сёння тут. Ды яны проста звар’яцеюць ад нашых з вамі здзяйсненняў".
Такім чынам, цырымонія інаўгурацыі 45-га прэзідэнта ЗША стартуе ўжо менш чым праз гадзіну. Пасля прысягі новы прэзідэнт вернецца ў Белы дом. А Барак Абама на верталёце накіруецца на ваенную базу Эндрус. Пазней Трамп з трыбуны рэзідэнцыі будзе прымаць інаўгурацыйны парад, ён пройдзе па Пенсільваніі-авеню ад кангрэса да Белага дома. Завершацца ўрачыстасці балямі.
