Галоўнай свецкай падзеяй дня, гэтага тыдня і, бадай, вясны стала вяселле брытанскага прынца Гары і амерыканскай актрысы Меган Маркл. За ўрачыстай цырымоніяй сачыў увесь свет. Трансляцыю каралеўскага вяселля глядзелі мільёны. Тысячы чалавек стаялі на вуліцах Віндзара, каб на свае вочы ўбачыць маладых. Шматлікія і зусім начавалі ля замка, каб заняць лепшыя месцы.
Прынцу Гары 33 гады, яго выбранніцы - 36. Меган Маркл ужо была ў шлюбе. Праўда, нядоўга. Саюз распаўся праз 2 гады. У гэтыя хвіліны ўжо ідзе вясельная вечарынка. Запрошаныя каля 200 чалавек. Мерапрыемства строга закрытае. Вядома, што будуць выступаць Элтан Джон і Эд Шыран. Магчыма, Беёнсе і Spice Girls. А зараз - аб тым, як праходзіў шлюб. Усе дэталі - у сюжэце Крысціны Камыш.
Жаніх і нявеста сустрэліся апоўдні ля капліцы Святога Георгія ў Віндзарскім замку. Пад вянок амерыканку павёў будучы свёкар прынц Чарльз, паколькі яе бацька на вяселле не прыехаў.
Усё прайшло вельмі добра - за падзеяй назіралі мільёны людзей па ўсім свеце. Свой апошні дзень перад вяселлем жаніх правёў разам з старэйшым братам Уільямам. З ім, з Кейт, а таксама з іх дзецьмі - прынцам Джорджам і прынцэсай Шарлотай - ужо пазнаёмілася маці Меган. Менавіта з ёй перад цырымоніяй шлюбу нявеста засталася ў шыкоўным гатэлі "Клайвдэн хаўс" непадалёк ад Віндзарскага замка.
Нявеста заказала вясельны ўбор у брытанскага дызайнера Клэр Уайт Келер, кіраўніка моднага дома Givenchy . Па традыцыі заручальныя кольцы былі вырабленыя з рэдкага валійскага золата. Упершыню такія кольцы выкарыстоўваліся на вяселлі маці цяперашняй каралевы Лізаветы Другой - Лізаветы Боўз-Лаён і герцага Ёркскага ў 1923 годзе.
На вяселле стагоддзя былі запрошаныя тысяча дзвесце чалавек. Сярод гасцей нямала знакамітасцяў - тэлевядучая Опра Уінфры, зорка футбола Дэвід Бэкхэм з жонкай Вікторыяй, акцёр Джордж Клуні з жонкай, праваабаронцай Амаль, спявак Элтан Джон, актрыса Прыянка Чопра, тэнісістка Серэна Уільямс з мужам. Дарэчы, Вікторыя Бэкхэм, парушыўшы традыцыі каралеўскага вяселля, прыйшла на шлюб у занадта цёмнай сукенцы ўласнага дызайну і ў змрочным настроі. У службе прыняў удзел хор "Карэн Гібсан энд Кінгдам", які выканаў музыку ў стылі гаспел.
Абвянчаў маладых духоўны кіраўнік царквы Англіі, архіепіскап Кентэрберыйскі Джасцін Уэлбі. У сваёй вясельнай клятве Маркл не давала абяцання слухацца мужа, а прынц Гары, як паведамляецца, прыняў рашэнне насіць заручальнае кольца, хоць па традыцыі ў каралеўскай сям'і мужчыны гэтага звычайна не робяць.
Пасля гэтага муж і жонка здзейснілі ў карэце 25-хвілінную паездку па вуліцах Віндзара, дзе іх прывіталі дзясяткі тысяч жыхароў і гасцей гэтага гарадка. Пасля працэсіі яны вярнуліся ў каралеўскі замак.
Прынц Гары і Меган Маркл вырашылі адмовіцца ад вясельных падарункаў і папрасілі ўсіх, хто жадаў іх павіншаваць, зрабіць ахвяраванні ў адзін з сямі дабрачынных фондаў, якія дапамагаюць хворым дзецям, а таксама бяздомным і жывёлінам. Мядовы месяц маладыя збіраюцца правесці ў Афрыцы.
Пасля вяселля герцагіні Сасекскай дадуць сямейную візу, праз 5 гадоў яна атрымае від на жыхарства і толькі потым зможа падаць дакументы на брытанскае грамадзянства.
