Краіны, якія напярэдадні выпусцілі ракеты, асуджаюць любое прымяненне хімзброі, а таксама прапануюць стварэнне незалежнага механізму расследавання інцыдэнту ў Думе.
Дакумент, які разгледзяць заўтра на пасяджэнні Савета Бяспекі ААН, заклікае забяспечыць пастаўкі гуманітарнай дапамогі і спыненне агню ў Сірыі. Нагадаем, напярэдадні на экстранным пасяджэнні Савет Бяспекі ААН не прыняў прапанаваную Расіяй рэзалюцыю. Афіцыйная Масква патрабавала ад ЗША і саюзнікаў неадкладна спыніць агрэсію ў дачыненні да Сірыі, а таксама ўстрымацца ад далейшага выкарыстання сілы ў парушэнне статута ААН і міжнароднага права. Кіраўнік МЗС Сяргей Лаўроў падкрэсліў, што ў тых, хто нанёс удары па Сірыі, няма абгрунтаванняў аперацыі, за выключэннем інфармацыі са СМІ і сацсетак.
Парушэннем міжнароднага права ўдар па Сірыі назвалі і амерыканскія эксперты. У Асацыяцыі па кантролі над узбраеннямі падкрэслілі, што атака супярэчыць не толькі статуту ААН, але і Канстытуцыі ЗША. Ваеннае рашэнне Трамп прыняў без кансультацый з кангрэсам. Гэтак жа паступілі Францыя і Вялікабрытанія.
Між тым па ўсім свеце праходзяць акцыі пратэсту. У ЗША дзясяткі чалавек выйшлі да Белага дома, скандзіруючы "Рукі прэч ад Сірыі". А ў Чыкага прайшоў мітынг пад лозунгам "Інтарэсы Амерыкі - не важнейшыя за жыццё сірыйцаў".
Супраць дзеянняў Трампа выступілі ў Іарданіі, Францыі, Грэцыі. 7 тысяч чалавек прайшлі па вуліцах Афінаў ад галоўнай плошчы да амерыканскага пасольства і спалілі флаг ЗША. Скончылася акцыя сутычкамі з паліцыяй.
