ЗША заявілі, што гатовыя нанесці прэвентыўны ўдар па Паўночнай Карэі, калі атрымаюць звесткі наконт таго, што КНДР вядзе падрыхтоўку да правядзення чарговага ядзернага выпрабавання. Амерыканскі флот на чале з ядзерным авіяносцам "Карл Вінсан" наблізіўся да КНДР на адлегласць авіяцыйнага ўдару. У найбліжэйшы час да яго далучацца японскія баявыя караблі. Ваенныя сілы суправаджаюць і атамныя падводныя лодкі з ракетамі "Тамагаўк". Пхеньян жорстка папярэджвае.
Хан Сон Руль, намеснік міністра замежных спраў КНДР: "У нас ужо ёсць магутныя ядзерныя сродкі стрымлівання. Калі ЗША будуць праводзіць безразважныя ваенныя манеўры, тады мы, КНДР, сустрэнем іх папераджальным ударам. Зараз мы параўноўваем палітыку Трампа ў дачыненні да КНДР з папярэдняй адміністрацыяй і мы зрабілі выснову, што яна стала больш жорсткай і агрэсіўнай".
Дыпламат запэўніў, што Пхеньян не будзе сядзець склаўшы рукі ў выпадку атакі і гатовы да вайны з амерыканцамі. Адказнасць за абвастрэнне сітуацыі Хан Сон Руль усклаў на Вашынгтон. І дадаў, што КНДР правядзе новае ядзернае выпрабаванне, калі палічыць патрэбным.
