Самым вострым і актуальным пытаннем, як і чакалася, стала сітуацыя вакол Сірыі. Уладзіміру Пуціну прыйшлося пераканаўча супрацьстаяць заходнім калегам па прынцыповых пазіцыях: недапушчэнне ваеннай дапамогі сірыйскім паўстанцам і патрабаванне дэталёвага расследавання выкарыстання хімічнай зброі. Такі паварот падзей супярэчыць адэкватнаму плану - пачатку палітычнага дыялогу. Да чаго прыйшла G-8 - распавядуць нашы карэспандэнты.
Расказвае Лізавета Казакова: Мірная жэнеўская канферэнцыя па Сірыі, хутчэй за ўсё, пройдзе ў жніўні, а не ў ліпені, як разлічвалі прыхільнікі палітычнага ўрэгулявання канфлікту. Лідары G-8 разышліся ў меркаваннях наконт сірыйскага пераходнага ўрада. Педаляваць тэму адстаўкі прэзідэнта Башара Асада не сталі. Вядома, што падобны крок супярэчыць канстытуцыі Сірыі. Зразумела, Асад будзе да канца супрацьстаяць спробам уварвання ў сваю краіну. Як бы ні ставіліся да гэтага ЕС і ЗША, якія, прыкрываючыся дыпламатычнымі заявамі, наладжваюць з сірыйскімі мяцежнікамі гандаль нафтай, падмацоўваючы тых зброяй.
Барак Абама, Прэзідэнт ЗША: Наконт Сірыі ў нас сапраўды розныя пункты погляду, але мы падзяляем цікавасць да скарачэння насілля і выкарыстання хімічнай зброі. Патрэбныя гарантыі, што яна не выкарыстоўваецца і не ствараецца. Мы хочам паспрабаваць вырашыць пытанне палітычнымі сродкамі, калі гэта магчыма.
Спробы не пераканаўчыя настолькі, што ледзь не перавялі васьмёрку ў фармат сямёрка плюс Расія. Літаральна днямі ЗША заявілі пра сваё рашэнне аказаць ваенную дапамогу сірыйскім паўстанцам, паралельна разглядаюць і пытанне аб адкрыцці беспалётнай зоны над Сірыяй. Краіны ЕС фактычна адмянілі эмбарга на пастаўкі ў Сірыю зброі яшчэ ў канцы мая. Паводле звестак агенцтвы Reuters, мяцежнікі ўжо 2 месяцы атрымліваюць пераносныя зенітна-ракетныя комплексы, якія закупляюцца ў Францыі і Бельгіі. Пры гэтым, гаворачы пра сірыйскі канфлікт, заходнія лідары пастаянна спасылаюцца на яго глабальныя наступствы для ўсіх. Калі выдзяляць сродкі на ўзбраенне і падрыхтоўку баевікоў, у тым ліку наёмнікаў, што ваююць пад выглядам апазіцыі, Еўропа рызыкуе паплаціцца за падобныя дзеянні ўспышкамі тэрарызму на сваёй тэрыторыі. І гэта разумее не толькі Башар Асад.
Башар Асад, Прэзідэнт Сірыі: Узбраенне баевікоў у Сірыі прывядзе да стварэння тэрарыстычных задворкаў Еўропы. Тэрарысты, атручаныя экстрэмісцкай ідэалогіяй, атрымаўшы баявы вопыт, прыменяць яго затым і ў еўрапейскіх краінах. Абвінавачанні ў прымяненні ўрадавымі войскамі хімічнай зброі супраць свайго народа - абсурдныя. Калі б Парыж, Лондан і Вашынгтон мелі хоць нейкі доказ сваіх сцвярджэнняў, яны прад'явілі б яго сусветнай грамадскасці. Гэта спроба апраўдаць ваеннае ўмяшанне.
Нягледзячы на аб'ектыўнасць такіх аргументаў, кожны застанецца пры сваім. Расія не згодзіцца на адхіленне ад улады законнага сірыйскага прэзідэнта. Сямёрка прадоўжыць раздзімаць сірыйскае вогнішча варожасці. Адзінае, з чым ніхто не змог паспрачацца, - неабходнасць арганізацыі мірнай міжнароднай канферэнцыі па Сірыі. У выніковым камюніке лідары G-8 заклікалі ўсе бакі сірыйскага канфлікту аб'яднацца і змагацца з агульным ворагам - Аль-Каідай.
