Спіс такіх дзяржаў зараз абмяркоўваецца ў Дзярждуме. Як паведамляе газета "Камерсант", небяспечнымі могуць быць прызнаныя Лівія, Сірыя, Ірак, Турцыя, Туніс і, магчыма, Украіна. Пры гэтым забароны плануецца ўводзіць на доўгі тэрмін. Гаворка ідзе аб некалькіх гадах.
Нагадаем, пасля крушэння самалёта кампаніі "Кагалымавія" Расія забараніла палёты ў Егіпет. Асноўная версія катастрофы - выбух на борце, за якім, паводле звестак заходніх спецслужбаў, можа стаяць егіпецкае аддзяленне групоўкі "Ісламская дзяржава".
І вось як павядуць сябе ў гэтых умовах расійскія аператары. Егіпет - для іх самы гарачы кірунак. Таму страты ад забароны палётаў у гэтую краіну ацэньваюцца мільярдамі рублёў. А пакуль расійскіх турыстаў экстранна эвакуіруюць з краіны пірамід. З якім настроем вяртаюцца на радзіму і якая сітуацыя зараз у аэрапортах - нам раскажа спецыяльны карэспандэнт з Масквы Дар'я Белавусава-Пятроўская.
У аэрапорце Дамадзедава ўсе гэтыя дні вельмі напружаная атмасфера. Менавіта сюды прыбываюць рэйсы з расійскімі турыстамі, якіх экстранна вывозяць з Егіпта. Дзеля іх бяспекі яны вылятаюць з гэтай краіны толькі з ручной паклажай. А іх багаж ляціць асобна грузавымі рэйсамі.
Сёння сваякі турыстаў, якія прыбываюць з Егіпта, вельмі панерваваліся. Рэйсы з Шарм-эль-Шэйха і Хургады затрымлівалі некалькі разоў.
Таму, бачачы родных, якія даляцелі ў цэласці і захаванасці, эмоцыям не было мяжы.
З Егіпта ў Расію ўжо экстранна вярнуліся больш як 25 тысяч турыстаў і больш як 200 тон багажу. Рэчы прыбываюць у аэрапорт Унукава, і толькі потым іх перавозяць у Дамадзедава. Каб неяк кампенсаваць напружаны настрой і сапсаваны водпуск, усіх, хто прыляцеў з Егіпта, а таксама пасажыраў, што атрымліваюць багаж з гэтай краіны, кампанія "Аэраэкспрэс" дастаўляе з Дамадзедава ў Маскву і зваротна цалкам бясплатна.
Для расійскіх тураператараў Егіпет - самы гарачы кірунак. Штомесяц тут адпачывалі ад 200 тысяч да 250 тысяч расійскіх турыстаў. Сярэдні кошт пуцёўкі каля $800 на чалавека. Да новага года было распрададзена ўжо 70 тысяч пуцёвак. Таму ў дадзенай сітуацыі страты расійскай турыстычнай галіны ад забароны палётаў у Егіпет - больш як 3,5 млрд. рублёў. І сёння масавае ануляванне пуцёвак можа прывесці шматлікія турфірмы да банкруцтва.
Як паведаміў Дзмітрый Мядзведзеў, забарона на рэйсы ў Егіпет не будзе знятая ў найбліжэйшы час. Паводле папярэдніх ацэнак, калі табу на палёты прадоўжыцца больш як 2-3 месяцы, шкода расійскаму турыстычнаму бізнесу можа скласці каля 200 млн. долараў.
