У Харкаве, Данецку і Луганску другія суткі не сціхаюць масавыя акцыі. У іх удзельнічаюць сапернікі новай улады. Дэманстрацыі суправаджаюцца захопамі адміністрацыйных будынкаў. Жыхары ўсходніх гарадоў узводзяць на вуліцах барыкады. Вярхоўная Рада Украіны прапанавала абвясціць на ўсходзе краіны рэжым надзвычайнага становішча. У рэгіён вылецелі высокапастаўленыя прадстаўнікі сілавых ведамстваў.
Расказвае Юрый Казлоў: Пратэсты ва ўсходніх абласцях Украіны ўспыхнулі напярэдадні. У нядзелю ў Харкаве, Данецку і Луганску сапернікі новай улады захапілі абласныя адміністрацыі. На флагштоках будынкаў з'явіліся расійскія флагі. Дэманстранты патрабавалі правядзення на ўсходзе Украіны рэферэндуму аб федэралізацыі.
Беспарадкі працягнуліся ўначы. У Луганску мітынгоўшчыкі занялі будынак СБУ. Паводле даных МУС, дэманстрантам удалося завалодаць зброяй, якая знаходзілася там. Параненыя 9 чалавек. Уначы было захоплена і ўпраўленне Службы бяспекі Украіны ў Данецку.
Як паведамляюць мясцовыя СМІ, маладыя людзі, якія назваліся народным апалчэннем Данбаса, пракраліся ў будынак і адразу ж прыняліся ўмацоўваць яго перыметр - на выпадак магчымага штурму праваахоўнікамі.
Сёння Данецкую вобласць абвясцілі народнай рэспублікай. Па інфармацыі ІТАР-ТАСС, гэта рашэнне было прынята дэпутатамі аблсавета. Тым часам, ВПС паведамляе, што аб стварэнні Данецкай народнай рэспублікі абвясцілі самі мытынгоўшчыкі, якія пракраліся ў залу пасяджэнняў абласнога савета. На 11 мая ў рэгіёне прызначаны рэферэндум аб самавызначэнні.
У сувязі з абвастрэннем сітуацыі на ўсходзе краіны, выконваючы абавязкі прэзідэнта Украіны Аляксандр Турчынаў адмяніў візіт у Літву і правёў экстранную нараду з кіраўнікамі сілавых ведамстваў. Захопнікам абладміністрацый прыгразілі правядзеннем антытэрарыстычнай аперацыі. У Луганск тэрмінова вылецелі сакратар Савета нацыянальнай бяспекі і абароны Андрэй Парубій і кіраўнік СБУ Валянцін Налівайчанка. У Данецк прыбыла кандыдат у прэзідэнты Юлія Цімашэнка, у Харкаў адправіўся кіраўнік МУС Арсен Авакаў.
Паралельна Вярхоўная Рада Украіны прапанавала абвясціць у неспакойных рэгіёнах рэжым надзвычайнага становішча. Заўтра дэпутаты разгледзяць закон аб узмацненні адказнасці за сепаратызм. Згодна з праектам дакумента, паведамляе УНІАН, за раскол дзяржавы будуць караць пазбаўленнем волі на тэрмін да 15 гадоў.
У самім Кіеве, зараз, дарэчы, таксама неспакойна. Сёння актывісты радыкальных арганізацый, у тым ліку, Правага сектара, заблакіравалі будынак Вярхоўнага суда. Правыя спрабавалі не дапусціць з'езду служыцеляў Феміды і патрабавалі неадкладнага прыняцця закону аб люстрацыі.
