2 апреля 2020
Наступствы ад пандэміі каранавіруса ўжо адчувальныя для сусветнай эканомікі. Больш за траціну краін свету папрасілі дапамогі ў Міжнароднага валютнага фонду ў выглядзе крэдытаў на агульную суму 20 мільярдаў долараў пад нізкую або нулявую стаўку. Паводле прагнозаў экспертаў, пандэмія можа пакінуць без працы каля 25 мільёнаў чалавек. Толькі за апошнія два тыдні ў Еўропе сама меней мільён чалавек страцілі працу. Беспрацоўе ў Аўстрыі вырасла на 52 % у параўнанні з сакавіком мінулага года. У Іспаніі менш чым за месяц працу страцілі 900 тысяч чалавек. Практычна палова кампаній Злучанага Каралеўства рыхтуе масавыя скарачэнні супрацоўнікаў. Авіякампанія "Брыціш Эйруэйз" адправіць у неаплачаны водпуск звыш 36 тысяч чалавек.
Рэкордныя тэмпы росту беспрацоўя ў ЗША
Рост беспрацоўя б'е ўсе рэкорды і ў Злучаных Штатах. Паводле звестак Міністэрства працы ЗША, толькі за апошнія 7 дзён па дапамогу звярнуліся звыш 6,5 мільёнаў чалавек. Усяго ж за мінулыя 2 тыдні страцілі працу 10 мільёнаў амерыканцаў.
