Посткаранавіруснае адраджэнне: краіны адкрываюцца, і эканоміка аднаўляецца

Уведзеныя раней з-за пандэміі абмежаванні змякчаюцца. Адразу некалькі еўрапейскіх дзяржаў гатовы прыняць турыстаў ужо гэтым летам. У чэрвені збіраюцца пачаць турыстычны сезон Турцыя, Харватыя, Мексіка і Ісландыя, у ліпені - Кіпр, Грузія, Чарнагорыя і Грэцыя (там ужо сёння адкрыліся больш за 500 пляжаў). Італія здымае забарону на ўезд і выезд з краіны і перамяшчэнне паміж рэгіёнамі - з 3 чэрвеня. Хоць лічбы загінуўшых ад каранавіруса - пужаюць: больш за 31 тысячу чалавек і гэта трэцяе месца ў свеце - пасля ЗША і Брытаніі.

Так, ЗША па-ранейшаму лідзіруе ў сумнай статыстыцы захварэўшых і загінуўшых ад COVID: там больш за паўтара мільёна заражаных і штодня гінуць сотні людзей. Але адзін за другім амерыканскія штаты адкрываюцца. У наваколлях Нью-Ёрка запрацавалі гандлёвыя і вытворчыя прадпрыемствы. А ў паўночных рэгіёнах краіны запусцілі заводы па мясаперапрацоўцы. З-за дэфіцыту свініны і ялавічыны - цэны на іх у краіне выраслі на 20 %.

Прычынай завяршэння "лакдауна" шмат у чым сталі шматмільярдныя страты, якія ўжо перасягнулі ўрон пасля глабальнага фінансавага крызісу 2008 года. Сусветная гандлёвая арганізацыя амаль удвая пагоршыла прагноз па аб'ёме сусветнага гандлю.

А Міжнародная арганізацыя працы прагназуе: работу страцяць 25 мільёнаў чалавек. Аб тым, як краіны адкрываюцца, а эканоміка аднаўляецца, на гэтым тыдні назірала Марыя Петрашко.