Галоўная сенсацыя дня. Расійскі журналіст Аркадзь Бабчанка жывы. Замах аказаўся інсцэніроўкай, мэтай якога было выяўленне заказчыка забойства. Пра гэта на спецыяльным брыфінгу распавялі кіраўнікі Генпракуратуры і Службы бяспекі Украіны. Да прэсы выйшаў і сам "забіты". Ён папрасіў прабачэння ў сям'і, якая аб аперацыі нічога не ведала. Як заявіў галоўны пракурор Украіны Юрый Луцэнка, за забойства Бабчанкі кілеру (былому ветэрану АТА) прапанавалі 30 тысяч долараў. Падазроны ў падрыхтоўцы замаху затрыманы, яго дапытваюць.
У арганізацыі забойства следства абвінаваціла расійскія спецслужбы. У Савеце Федэрацыі Расіі спецаперацыю СБУ назвалі "пастаноўкай і правакацыяй".
Крытычна да інсцэніроўкі аднеслася і арганізацыя "Рэпарцёры без меж". Яе кіраўнік Крыстаф Дэлуар назваў здарэнне маніпуляцыяй украінскіх спецслужбаў і новым крокам у інфармацыйнай вайне. "Для ўрада заўсёды вельмі небяспечна іграць з фактамі, асабліва выкарыстоўваючы журналістаў для сваіх фальшывых гісторый", - заявіў Дэлуар.
Сапраўды, навіны аб гібелі Аркадзя Бабчанкі выглядалі больш чым праўдападобна. Бо гучныя заказныя забойствы ва Украіне - не рэдкасць. Напрыклад, Бабчанку пашанцавала куды больш, чым Паўлу Шарамету. Летам 2016 расійскі журналіст (ураджэнец Беларусі) быў узарваны ў сваім аўтамабілі ва ўкраінскай сталіцы.
Вясной мінулага года прама ў цэнтры Кіева кілер застрэліў былога дэпутата расійскай Дзярждумы Дзяніса Вараненкава. Усяго з 2013 ва Украіне загінулі альбо былі забітыя 19 журналістаў.