Новы прэзідэнт Казахстана прыняў першыя кадравыя рашэнні

Кіраўнік беларускай дзяржавы Аляксандр Лукашэнка накіраваў віншаванні Касым-Жамарту Такаеву з уступленнем на пасаду прэзідэнта Рэспублікі Казахстан.

"У Беларусі Вы вядомы як мудры дзяржаўны дзеяч, які даўно заслужыў павагу казахстанскага народа. Падчас нашай нядаўняй сустрэчы ў Мінску Вамі была пацверджана гатоўнасць да далейшага ўмацавання ўзаемадзеяння паміж дзвюма краінамі", - гаворыцца ў віншаванні.

Кіраўнік дзяржавы перакананы, што беларуска-казахстанскае ўсебаковае супрацоўніцтва будзе і надалей развівацца ў духу стратэгічнага партнёрства і даверу.

Між тым, новы прэзідэнт Казахстана ўжо прыступіў да працы і прыняў першыя кадравыя рашэнні. Касым-Жамарт Такаеў сёння падпісаў указы аб прызначэнні начальніка канцылярыі і кіраўніка спраў. Нагадаем, па ініцыятыве Такаева сталіца дзяржавы Астана будзе пераназваная ў Нурсултан у гонар першага прэзідэнта. І сёння стала вядома, што жыхароў сталіцы будуць па-ранейшаму зваць астанчанамі.