Як паведамляюць СМІ, за 3 хвіліны да крушэння пасажырскага лайнера ў кабіне пілотаў павысілася тэмпература. Гэта неафіцыйная інфармацыя. Сваякі загінуўшых у катастрофе чакаюць знаходжання і расшыфроўкі чорных скрынь. Толькі звесткі бартавых самапісцаў здольныя праліць святло на прычыны трагедыі.
У справе аб крушэнні Airbusа А320 кампаніі EgyptAir па-ранейшаму застаецца шмат белых плям. Афіцыйнай інфармацыі аб ходзе расследавання вельмі мала. Сваякі прапаўшых без вестак даведваюцца падрабязнасці са СМІ. Свежая інфармацыя, як правіла, публікуецца са спасылкай на ананімныя крыніцы і тут жа абвяргаецца ўладамі. Канкрэтна вядома толькі адно - самалёт пацярпеў крушэнне ў водах Міжземнага мора 19 мая. Частка абломкаў лайнера выяўлена. Іх даследуюць спецыялісты. Пошукавая аперацыя працягваецца.
У храмах Францыі і Егіпта працягваюцца службы ў памяць аб ахвярах трагедыі. Гібель 66 чалавек, якія знаходзіліся на борце лайнера, не пацверджана афіцыйна, але надзею на тое, што пры крушэнні Airbusа хтосьці выжыў, страцілі нават сябры і сваякі пасажыраў злашчаснага рэйса.
Ні аднаго цэлага цела ратавальнікам выявіць не ўдалося. Усяго знойдзена каля 80 фрагментаў. Гэта, на думку спецыялістаў, гаворыць пра тое, што лайнер разваліўся на часткі ў паветры. З-за чаго - незразумела. У аўторак СМІ паведамілі, што эксперты знайшлі на астанках пасажыраў сляды ўзрыўчаткі, але гэтая інфармацыя была абвергнута і егіпецкімі ўрачамі, і французскімі следчымі.
Пакуль найбольш імаверная версія крушэння - пажар на борце, зноў жа, незразумелага паходжання. Адразу пасля трагедыі стала вядома, што датчыкі, усталяваныя ў туалеце каля кабін, зафіксавалі задымленне. Сёння егіпецкая "Аль-Ахрам" напісала, што за некалькі хвілін да знікнення з радараў лайнер перадаваў звесткі аб павышэнні ўзроўня тэмпературы каля вокнаў другога пілота.
Цім Ван Беверэн, авіяцыйны эксперт: "Паволе звестак, спачатку быў атрыманы дакладны сігнал аб задымленні ў туалеце, пасля аналагічны сігнал быў перададзены з адсека электроннага абсталявання. Затым менш чым праз хвіліну адключыўся блок кіравання палётам. Гэта гаворыць пра тое, што на борце быў пажар, праводка хутка згарэла. Менавіта таму не было сігналу бедства і пілоты не змаглі папярэдзіць пра здарэнне дыспетчараў. Усё элементарна, пілотаў вучаць, калі на борце праблемы, а сувязі з дыспетчарамі няма, трэба зніжацца, каб не перасекчыся з іншым самалётам, і шукаць месца для пасадкі".
Паводле звестак з часопіса агляду тэхнічнага стану самалёта - ён праводзіцца перад кожным вылетам - Airbus быў спраўны. Размовы аб зносе таксама не ідзе. Першы раз самалёт падняўся ў паветра ў 2003 годзе. На момант крушэння яму было 12 гадоў і 10 месяцаў. Рэйс Парыж - Каір быў для лайнера пятым за суткі. 18 мая паветранае судна вылецела з Эрытрэі ў Егіпет, адтуль у Туніс, зноў у Егіпет, затым у Францыю. Паводле звестак Мінабароны Грэцыі, перад крушэннем лайнер выконваў дзіўныя манеўры - яго хістала з боку ў бок, пасля чаго самалёт прапаў з экранаў радараў. Афіцыйны Каір запытаў у Афін пацвярджэння гэтых даных. У любым выпадку гаварыць аб прычыне катастрофы да расшыфроўкі чорных скрынь - усё роўна, што варажыць на кафейнай гушчы, адзначаюць эксперты. Як напісала ў аўторак егіпецкае выданне "Аль-Ватан", ВМС краіны ўжо выявілі сігналы чорных скрынь загінуўшага лайнера. Паводле звестак газеты, яны знаходзяцца на глыбіні тры кіламетры. Напярэдадні паведамлялася, што на ўздым бартавых самапісцаў пойдзе двое сутак.
