Міністр абароны ЗША загадаў праверыць сістэму бяспекі на ўсіх амерыканскіх ваенных аб'ектах па ўсім свеце. Рашэнне выклікана трагічным інцыдэнтам у Вашынгтоне. Нагадаем, на ваенна-марскім аб'екце ў сталіцы ЗША былы ваенны рэзервіст учыніў страляніну, забіўшы 12 чалавек і параніўшы больш за 10. Нягледзячы на праблемы з псіхікай і нелады з законам (у мінулым яго затрымлівалі за страляніну ў грамадскім месцы), у яго не анулявалі ліцэнзію на валоданне зброяй, і ён меў допуск на рэжымны аб'ект. Міністр абароны прызнаў, што былі дапушчаныя памылкі, якія зараз неабходна выправіць.