Масква высылае брытанскіх дыпламатаў. На працягу тыдня Расію павінны будуць пакінуць 23 супрацоўнікі дыпмісіі Злучанага Каралеўства. Таксама адкліканы дазвол на адкрыццё новага консульства Вялікабрытаніі ў Санкт-Пецярбургу і спынена дзейнасць Брытанскага савета. Гэта грамадская арганізацыя, праз якую расіяне маглі здаць міжнародны экзамен па англійскай альбо паступіць у ВНУ Злучанага Каралеўства. Усе гэтыя меры сталі адказам на высыланне 23 расійскіх дыпламатаў з Вялікабрытаніі.
Дыпламатычны скандал паміж Лонданам і Масквой разгарэўся на фоне атручання былога палкоўніка ГРУ Сяргея Скрыпаля і яго дачкі ў горадзе Солсберы. Віну на інцыдэнт брытанскі ўрад усклаў на Расію. Расійскія дыпламаты адпрэчваюць абвінавачанні, называюць іх бяздоказнымі.
Паводле даных брытанскіх следчых, Сяргей Скрыпаль і яго дачка былі атручаныя рэчывам нервова-паралітычнага дзеяння "Навічок", якое распрацоўвалася ў СССР. Афіцыйны прадстаўнік расійскага Міністэрства замежных спраў заявіла сёння, што хімзброя з такой назвай на тэрыторыі Расіі ніколі не выраблялася. А магчымымі пастаўшчыкамі газу, ад якога пацярпеў былы разведчык, маглі стаць Вялікабрытанія, Славакія, Чэхія альбо Швецыя - падкрэсліла Марыя Захарава.
