Масавая бойка ў Вярхоўнай радзе Украіны

У бойцы сышліся дэпутаты з прапрэзідэнцкага "Блока Пятра Парашэнкі" і прэм'ерскай фракцыі "Народны фронт". Інцыдэнт адбыўся падчас выступлення кіраўніка кабміна. Дэпутат Алег Барна з "Блока Парашэнкі" падбег да трыбуны, падарыў прэм'еру букет кветак і паспрабаваў вынесці Яцэнюка з-за подыума. Да Барны - удзельніка баявых дзеянняў на Данбасе - падбеглі дэпутаты "Народнага фронту" і пачалі яго збіваць. На ратунак паплечніку кінуліся яго аднапартыйцы. Бойка працягвалася некалькі хвілін. Пасяджэнне парламента было прыпынена. Пасля інцыдэнту прадстаўнікі "Народнага фронту" і "Блока Пятра Парашэнкі" папрасілі прабачэння адзін у аднаго. Падставай для бойкі стала абмеркаванне пытанняў энергетычнай галіны. Міністр унутраных спраў Украіны Арсен Авакаў чакае рэакцыі прэзідэнта на здарэнне. Ля сценаў Рады праходзіць мітынг за адстаўку ўрада. У ім удзельнічаюць некалькі сотняў чалавек.