Лідары краін Еўрасаюза падводзяць вынікі года і спрабуюць выпрацаваць адзіную стратэгію на 2017. Галоўныя тэмы саміту ў Бруселі - міграцыйны крызіс, Brexit, сітуацыя ў Сірыі і пытанні бяспекі.
У гэтыя хвіліны прэзідэнт Савета ЕС Дональд Туск дае выніковую прэс-канферэнцыю. Раней палітык адзначыў, што асноўная мэта сустрэчы - узмацненне еўрапейскай бяспекі і паляпшэнне абароны грамадзян Еўропы. Аб канкрэтных выніках саміту пакуль не паведамляецца. Еўрапейскія СМІ ўжо назвалі брусельскую сустрэчу рухам па "мінным полі". Шматлікія пытанні з'яўляюцца вострымі як для асобных краін, так і для ўсяго Саюза. Найбольш жорсткія дэбаты разгарнуліся наконт ратыфікацыі пагаднення аб асацыяцыі Украіны і ЕС. Нідэрланды настойваюць, каб з дакумента ўбралі радок аб перспектыве членства гэтай краіны ў Еўрасаюзе. У Амстэрдаме асцерагаюцца вялікай колькасці працоўных мігрантаў з Украіны. Таксама кіраўнік місіі МВФ у Кіеве раней заявіў, што ўкраінскай эканоміцы спатрэбіцца 25 гадоў, каб выйсці на ўзровень развіцця сярэдняй еўрапейскай дзяржавы. Тым не менш Польшча, Чэхія і краіны Балтыі жорстка раскрытыкавалі галандскі дэмарш. Разгляд яшчэ аднаго важнага для Украіны пытання - аб адмене візавага рэжыму - перанесены на красавік.