У штаб-кватэры Арганізацыі Аб'яднаных Нацый пачала працу 68-я сесія Генасамблеі ААН. Падзея, якую традыцыйна завуць вялікай арэнай для абмеркавання і ўрэгулявання самых вострых сусветных праблем і выклікаў. Беларускую дэлегацыю ўзначаліць Міністр замежных спраў Уладзімір Макей. Плануецца, што яго пленарнае выступленне адбудзецца на наступным тыдні. Сёлета ў позве дня было заяўлена 170 тэм, зрэшты, яшчэ да пачатку ніхто не сумняваўся ў тым, што цэнтральнай стане толькі адна з іх - і гэта, вядома, сітуацыя ў Сірыі. Напярэдадні ў Савбясе ААН прапанавалі праект сірыйскай рэзалюцыі. Тэкст дакумента распаўсюдзілі на сустрэчы сталай пяцёркі Савета, куды ўваходзяць Расія, ЗША, Вялікабрытанія, Францыя і Кітай. Разгляд праекта пачнецца ў найбліжэйшыя дні. Між тым у самым спрэчным пытанні: хто ўжыў хімічную зброю 21 жніўня ў прыгарадзе Дамаска? - з'яўляюцца новыя і вельмі цікавыя падрабязнасці… Лізавета Казакова працягне.
Рэзалюцыя па Сірыі павінна гарантаваць ліквідацыю хімічнай зброі згодна з дамоўленасцямі. Сірыя на працягу тыдня павінна прадставіць поўны спіс зброі з хімічнага арсенала. Пасля гэтага атрутныя рэчывы будуць вывезеныя з краіны і ліквідаваныя.
Пан Гі Мун, Генеральны сакратар ААН: Дамову, дасягнутую Расіяй і ЗША, прынцыпова падтрымліваюць усе дзяржавы - члены Савета Бяспекі. У гэтай сітуацыі Савбяс павінен неадкладна адрэагаваць, распачаўшы дзеянні, якія будуць мець прымусовы характар. Я шчыра спадзяюся на гэта. Мы павінны ўпэўніцца, што хімічная або любая іншая зброя масавага паражэння не будзе выкарыстоўвацца ў баявых дзеяннях. Гэта прынцыпова важна.
Цяперашні даклад ААН ад высновы, кім была ўжытая хімзброя, устрымаўся. Злучаныя Штаты працягваюць прытрымлівацца суровай рыторыкі. Як заявіў прэс-сакратар Белага Дома Джэй Карні, дакумент павінен прадугледжваць сур'ёзнае пакаранне для ўлад Сірыі ў выпадку невыканання імі сваіх абавязацельстваў.
Тым часам афіцыйны Дамаск перадаў Расіі новыя рэчыўныя доказы ўжывання хімічнай зброі ўзброенай апазіцыяй. Пра гэта паведаміў намеснік кіраўніка МЗС Сяргей Рабкоў, які правёў перамовы з афіцыйнымі асобамі адміністрацыі прэзідэнта Асада. Расія лічыць, што хімічная атака ў прыгарадзе Дамаска 21 жніўня - правакацыя. Пра гэта сказаў пастаянны прадстаўнік Расіі пры ААН Віталь Чуркін. Дарэчы, там не загінуў ні адзін баявік, што падаецца вельмі дзіўным. Бо Гута - зона падкантрольная баевікам. ЗША з свайго боку хвалююцца, што аказваюць узброеным мяцежнікам недастатковую падтрымку.
Джон Макейн, сенатар-рэспубліканец: Першым чынам, я б узмацніў нашу падтрымку Свабоднай арміі Сірыі. Наш прэзідэнт яшчэ два гады таму заяўляў, што Асад павінен пайсці. І што сталася з яго словамі? І я б аказаў ім падтрымку, якая ім спатрэбіцца, каб змяніць суадносіны сіл на поле бою, каб гэта прывяло да адстаўкі Асада. Гэта заўсёды было нашай мэтай.
У сваю чаргу разведка ЗША ведае аб пастаўках хімічнай зброі ў Сірыю Аль-Каідай. Былы супрацоўнік Пентагона Майкл Маклуф заявіў, што дакумент належыць Нацыянальнаму цэнтру наземнай разведкі. Такім чынам, рэзалюцыя па адмове Сірыі ад хімзброі прынятая, Дамаск гатовы на ўсе яе ўмовы. Але прэзідэнт Абама адназначна заявіў: што б там ні было з раззбраеннем, ЗША будуць дамагацца сыходу з палітычнага жыцця Башара Асада. Словам, засталіся пры сваім і на ўсякі выпадак пужаюць Расію пагрозамі санкцый у дачыненні да расійскіх банкаў. ВТБ, другі па велічыні банк Расіі, адрэагаваў на правакацыю - аспрэчыў сцвярджэнні амерыканскіх сенатараў аб наяўнасці ў банку якіх-небудзь рахункаў кіраўніцтва Сірыі. Сусветныя дыпламатычныя цэнтры па-ранейшаму па розныя бакі барыкад.
