Кіраўнік каталонскага ўрада назваў Каталонію суверэннай краінай, але заклікаў парламентарыяў адкласці працэдуру аб'явы незалежнасці на некалькі тыдняў.
Такім чынам Карлес Пучдэмон мае намер пакінуць магчымасць для дыялогу з афіцыйным Мадрыдам. У сваім выступленні палітык раскрытыкаваў паліцыю каралеўства за непрапарцыйнае прымяненне сілы 1 кастрычніка пры спробе спыніць волевыяўленне, якое, нагадаем, было прызнана ўладамі Іспаніі пазапраўным. Таксама Пучдэмон падкрэсліў, што ён па-ранейшаму мае намер прытрымлівацца вынікаў рэферэндуму аб незалежнасці і заклікаў цэнтральны ўрад устрымацца ад гвалту.
Карлес Пучдэмон, старшыня ўрада Каталоніі: "Я звяртаюся да ўрада Іспаніі з просьбай спыніць рэпрэсіі і да кіраўніцтва Еўрасаюза з просьбай прызнаць наш суверэнітэт. Я ўпэўнены, калі ўсе будуць паважаць наш выбар, то сітуацыя вырашыцца мірна і ў найбліжэйшыя дні".
Зараз у будынку каталонскага ўрада ідуць дэбаты аб неабходнасці аб'явы суверэнітэту. Да будынка жэнералітата сцягнутыя вялікія сілы паліцыі і падраздзяленні сапёраў. Таксама ў цэнтры Барселоны сабраліся тысячы людзей з флагамі аўтаномнай супольнасці. Пакуль дэманстранты паводзяць сябе мірна. Паліцыя не ўмешваецца. Раней іспанскія ўлады абяцалі арыштаваць Пучдэмона і яго саратнікаў у выпадку абвяшчэння суверэнітэту рэгіёна.