Еўрапейскі Вяшчальны Саюз аб'явіў пра змены ў правілах песеннага конкурсу праз скандалы, якія суправаджалі "Еўрабачанне" ва Украіне. На сайце арганізацыі паведамляецца, што самы прыкры момант быў звязаны з забаронай на ўезд у краіну прадстаўніку Расіі Юліі Самойлавай (за гэта, нагадаем, Нацыянальная грамадская тэлерадыёкампанія Украіны была аштрафаваная).
Пасля гэтай гучнай справы і наступнага рашэння Масквы праігнараваць мерапрыемства ЕВС з 2018 года будзе патрабаваць ад краін-удзельніц не ўключаць у дэлегацыі асоб, якім абмежаваны ўезд у краіну-гаспадыню. Яшчэ адна змена ў рэгламенце ўзмацняе жорсткасць выканання часавых рамак пры падрыхтоўцы да конкурсу. У выпадку парушэнняў права на правядзенне "Еўрабачання" могуць перадаць іншай краіне. У 2017 годзе Кіеў у тэрміны падрыхтоўкі конкурсу не ўклаўся.
