Старшыня Еўрапейскага савета Дональд Туск па выніках саміту ЕС у Бруселі заявіў, што Еўропа зачыняе дзверы для нелегальных мігрантаў. Меры па абмежаванні патокаў бежанцаў утрымліваюцца ў пагадненні з Турцыяй. Згодна з ім, з гэтага часу ўсе мігранты, якія трапляюць у ЕС з Турцыі, будуць адпраўляцца назад пасля (як гэта называюць дыпламаты) індывідуальнай ацэнкі іх сітуацыі.
Акрамя таго, бакі дамовіліся прадоўжыць перамовы наконт уступлення Турцыі ў ЕС. Зрэшты, некаторыя еўрапейскія лідары настроеныя вельмі скептычна. На іх думку, пагадненне з Анкарой не зможа прынцыпова вырашыць праблему бежанцаў. Галоўныя неадпаведнасці крытыкі здзелкі бачаць у арыфметыцы: Еўропа гатовая пасяліць у сябе не больш за 72 тысячы бежанцаў, пры тым што з пачатку года Эгейскае мора перасеклі як мінімум удвая больш. Акрамя таго, 937 чалавек з пачатку міграцыйнага крызісу атрымалі законную прапіску ў краінах ЕС. А гэта значыць, што незаконна ў Еўропе працягваюць знаходзіцца больш за мільён чалавек.
