Цырымонія інаўгурацыі (самая дарагая ў гісторыі) адбылася менш чым гадзіну таму ў Вашынгтоне. Для таго каб трапіць на ўрачыстае мерапрыемства, у сталіцу ЗША прыехалі каля мільёна чалавек. Зрэшты, гэта няшмат. На першую інаўгурацыю папярэдняга амерыканскага лідара Барака Абамы ў 2009 годзе прыбылі 2 мільёны гледачоў. Білеты на цырымонію мог купіць кожны, хто жадаў, стартавы кошт - 150 долараў. А самы дарагі пакет білетаў - коштам 1 мільён - даваў магчымасць удзельнічаць таксама ў афіцыйным балі, мець зносіны з членамі кабінета Трампа, віп-трыбуну на парадзе і нават вячэраць пры свечках з прэзідэнцкай парай. Старт урачыстасцяў - традыцыйнае наведванне набажэнства ў царкве Святога Іаана. У ім прынялі ўдзел абраны прэзідэнт і абраны віцэ-прэзідэнт Майкл Пенс з сем'ямі, а таксама члены новага кабінета разам са сваякамі і сябрамі. Затым яны заехалі ў Белы дом на чаяванне. Пра тое, як праходзіла афіцыйная частка цырымоніі інаўгурацыі, раскажа Вольга Давідовіч.
45-ы прэзідэнт ЗША афіцыйна ўступіў на пасаду. Перад мільённым натоўпам Дональд Трамп вымавіў кароткую прысягу, паабяцаўшы добрасумленна выконваць абавязкі кіраўніка дзяржавы і абараняць Канстытуцыю. Прычым, зрабіў гэта на дзвюх Бібліях - на адной прыносіў клятву Аўраам Лінкальн, другая - сямейная.
Дональд Трамп, прэзідэнт ЗША: "Я, Дональд Джон Трамп, урачыста клянуся і пацвярджаю, што буду сумленна выконваць абавязкі прэзідэнта Злучаных Штатаў і буду, наколькі дазволяць мае сілы, засцерагаць, ахоўваць і абараняць Канстытуцыю Злучаных Штатаў. І дапаможа мне Бог".
Затым новы прэзідэнт вымавіў інаўгурацыйную прамову, у якой расказаў пра асноўныя напрамкі сваёй дзейнасці на пасадзе. Прамову Трамп напісаў асабіста, стаўшы трэцім амерыканскім лідарам (пасля Аўраама Лінкальна і Франкліна Рузвельта), які не стаў звяртацца па дапамогу да спічрайтараў.
Як і было абяцана саветнікам Белага дома Келін Конуэй, першы зварот 45-га прэзідэнта да нацыі атрымаўся элегантным, магутным і кароткім. Дарэчы, працягласць прамовы - паказчык, на які ў ЗША звяртаюць увагу. Напрыклад, першы прэзідэнт Джордж Вашынгтан сказаў усяго 135 слоў, а дзявяты - Уільям Гарысан - гаварыў дзве гадзіны.
На гэтым афіцыйная частка цырымоніі лічыцца завершанай і пачынаецца святочная: у зале Капітолія накрываецца інаўгурацыйны абед, за якім ідзе парад. Сёлета ён прадоўжыцца 90 хвілін - Дональд Трамп будзе назіраць за шэсцем з прэзідэнцкай трыбуны. Для вартавых парадку сённяшнія мерапрыемствы - гэта вельмі складаная аперацыя, якую класіфікуюць як падзею нацыянальнай бяспекі. Усе пад'езды да Капіталійскага ўзгорка перакрылі яшчэ за суткі. У падмацаванне мясцовай паліцыі (больш чым 20 тысяч чалавек) у Вашынгтон дасланая нацыянальная гвардыя - 5 тысяч вайскоўцаў з усёй краіны.
Джозеф Клэнсі, кіраўнік сакрэтнай службы ЗША: "Мы павінны быць гатовыя да любых выклікаў. Сёння людзі гатовыя рабіць тое, што яны не гатовыя былі рабіць раней".
Каб пазбегнуць тэракта, падобнага на тыя, што адбываліся ў Еўропе, калі людзей душылі грузавікамі, дарогі ў Вашынгтоне заблакіравалі цяжкай тэхнікай. Але больш за ўсё ўлады асцерагаюцца, што масавыя пратэсты супраць Трампа выйдуць з-пад кантролю. Праваахоўнікі налічылі 63 групы актывістаў, якія плануюць розныя дэманстрацыі. Але і за новага прэзідэнта збіраюцца мітынгаваць многія.
Завершаць інаўгурацыю тры афіцыйныя балі, у кожным з якіх прымуць удзел прэзідэнт і першая лэдзі. Акрамя гэтага, у амерыканскай сталіцы пройдуць і неафіцыйныя, а таксама паўафіцыйныя балі, шматлікія канцэрты і феерверкі. Дарэчы, напярэдадні падчас салюту, які далі ў гонар Дональда Трампа над Нацыянальнай алеяй, замест літар USA ў небе над Вашынгтонам з'явілася USR (па Інтэрнэце пайшлі шматлікія жарты пра "Злучаныя Штаты Расіі" і "рускіх хакераў", якія ўсё гэта ўчынілі).
Дональд Трамп мае намер як мага хутчэй пачаць працаваць. Віцэ-прэзідэнт Майкл Пенс паведаміў, што падрыхтавана каля 200 указаў, і ўжо ў свой першы дзень на высокай пасадзе 45-ы прэзідэнт падпіша некаторыя з іх - у тым ліку і тыя, якія адмяняюць шэраг рашэнняў Барака Абамы.
