Кіраўнік МЗС Вялікабрытаніі Борыс Джонсан заклікаў міжнародную супольнасць узмацніць націск на Маскву з-за расійскай палітыкі па Сірыі. У прыватнасці, ён паспрабаваў ускласці на расійскіх вайскоўцаў абстрэл гуманітарнага канвою ААН 20 верасня. Джонсан адкрыта звярнуўся да брытанцаў з заклікам арганізаваць акцыі пратэсту ля будынка пасольства Расіі ў Лондане.
На выпады Джонсана неадкладна адрэагавалі ў Маскве. Прэс-сакратар Прэзідэнта Расіі Дзмітрый Пяскоў заявіў, што "ў Крамлі не бачаць прадмета для ўвядзення санкцый у дачыненні да Расіі", бо гэта адзіная краіна, якая легітымна змагаецца з тэрарызмам у Сірыі. Заклікі брытанца прагучалі літаральна напярэдадні галасавання ў Савеце Федэрацыі Расіі, які сёння ратыфікаваў законапраект аб бестэрміновым і бязвыплатным размяшчэнні авіягрупы расійскіх вайскоўцаў у Сірыі.
У Алепа і яго наваколлях працягваюцца цяжкія баі: Дамаск пры падтрымцы Масквы наносіць удары па пазіцыях тэрарыстаў.
