Развіваць дзіцячы гандбол і выяўляць таленавітых спартсменаў яшчэ ў школе. Такія мэты ставіць перад сабой адзін з самых маштабных спартыўных праектаў краіны - ZubrCup. Яго ініцыятар і куратар - Брэсцкі гандбольны клуб імя Мяшкова. За два гады існавання дзіцячай гандбольнай лігі ў спаборніцтвах ZubrCup прынялі ўдзел звыш тысячы хлапчукоў. Пра першыя крокі ў свет вялікага спорту Вікторыя Патоня.
У дзіцячым гандболе ўсё па-даросламу. І не менш эмацыянальна. Матчы, суддзі, свая камандная форма. Турніры ZubrCup аб'ядноўваюць юных спартсменаў з усёй краіны. Сёння гэта 69 каманд. Дзіцячая гандбольная ліга - унікальная магчымасць выйсці на паркет як для школьнікаў з буйных гарадоў, так і невялікіх райцэнтраў і пасёлкаў. У сезон каманды гуляюць да чатырох тураў. Кожны доўжыцца па тры дні. Юныя спартсмены на такіх спаборніцтвах атрымліваюць галоўнае - вопыт.
Юрый Буцкевіч, трэнер гродзенскай СДЮШАР № 8: "Турніраў праводзіцца шмат, але ў іх прыходзіцца ўкладваць сродкі або спартыўнай школы, або бацькоў. ZubrCup дае магчымасць удзельнічаць практычна бясплатна, толькі аплаціўшы праезд. І плюс да гэтага ў нас з'яўляецца дадатковая магчымасць удзельнічаць на працягу сезона ў чатырох турах, згуляць як мінімум 12-15 гульняў".
Таленавітых хлопцаў адбіраюць і ствараюць кадравы рэзерв. Куратар дзіцячай гандбольнай лігі ZubrCup - адзін з наймацнейшы клубаў Еўропы БГК імя Мяшкова. Для маладых спартсменаў арганізоўваюць не толькі гульні, але і запрашаюць пахварэць на Лізе чэмпіёнаў або адчуць атмасферу міжнародных турніраў. І калі пачыналі з 16 каманд, то сёння ахвотнікаў значна больш.
Мікалай Харашун, старшыня праўлення дзіцячай гандбольнай лігі ZubrCup: "Гэта 69 каманд з 33 спартыўных школ Беларусі. Гэта яшчэ не мяжа, будзем імкнуцца і далей пашыраць лігу, таму што ёсць ахвотнікі з наступнага года да нас далучыцца. А ў выніку гэтага, мы думаем, у беларускім гандболе дадасца больш прафесійных гульцоў, якія заменяць легіянераў, у тым ліку ў складзе БГК".
Хлопцы з ZubrCup гуляюць у дывізіёне А, фарм-клубах. Дзіцячая гандбольная ліга - гэта добры рэзерв для зборных і клубаў краіны. Зараз у разгары трэці сезон, колькасць гульцоў - звыш тысячы. І гэтая лічба, як і цікавасць да гандбола, расце.
