Учора мы сталі сведкамі таго, ад чаго адвыкнуць ужо нельга! Беларускія фрыстайлісты зноў перамагаюць, і краіна павінна ведаць сваіх герояў. На 4-м этапе Кубка свету ў Маскве, які традыцыйна прайшоў на Вараб'ёвых горах, у дысцыпліне "лыжная акрабатыка" ў жанчын роўных не было алімпійскай чэмпіёнцы Пхёнчхана Ганне Гуськовай - вельмі рады, што яна вяртаецца ў строй. У суперфінале беларуска выканала трайное сальта, за што і атрымала самую высокую суму балаў. Для Гуськовай гэта першая ўзнагарода ў сезоне. Увесь мінулы год Ганна прапускала - аднаўлялася пасля траўм.
Услед за жанчынамі на схіл выйшлі прадстаўнікі моцнага полу. І тут прадстаўнік Беларусі паказаў годны вынік! Павел Дзік падняўся на трэцюю прыступку ўпершыню ў кар'еры на этапе Кубка свету. Ён зарабіў ледзь больш як 112 балаў.
А, нягледзячы на тое, што з-за траўмы Аляксандра Раманоўская прапусціла этап Кубка свету ў Маскве, яна па-ранейшаму лідар агульнага заліку ў лыжнай акрабатыцы. Ганна Гуськова ж пасля сваёй перамогі паднялася на чацвёртую пазіцыю рэйтынгу.
Адразу пасля Масквы лепшыя лыжныя акрабаты збяруцца ў Мінску. 22 лютага (зноў жа, у гасцінных Раўбічах) адбудзецца чарговы этап Кубка свету.
Золата і бронза ў беларускіх фрыстайлістаў на этапе Кубка свету ў Маскве
16 февраля 2020