Творчасць і спорт сустрэліся ў адной прасторы. Упершыню ў Беларусі чэмпіянат па шахматах праходзіць у Нацыянальным гістарычным музеі. Тактыка і стратэгія шахматыстаў часам падобныя на мастацтва - таму і знайшлі сваё адлюстраванне ў творчасці мастакоў. Шахматы развіваюць фантазію і ўвагу, выхоўваюць характар і логіку мыслення. Так беларускія мастакі паспрабавалі разгадаць шахматныя сюжэты і затым маляўніча адлюстравалі іх вобразы. Напрыклад, перажыванні спартсменаў падчас гульні. Сапраўдны калейдаскоп думак - на шахматных дошках. А вакол "Артэфакты" - унікальная калекцыя шахматных фігур з фондаў музея. Ларыса Гулякевіч пра тое, ці лёгка зрабіць "ход канём" у асяроддзі высокага мастацтва.
Шахматы - адначасова спорт, гульня, навука і мастацтва. Таму ідэя правесці чэмпіянат Беларусі па шахматах знайшла сваё ўвасабленне менавіта ў Нацыянальным гістарычным музеі краіны. Тут захоўваюцца артэфакты і шахматныя фігуркі, знойдзеныя на тэрыторыі Беларусі ў розныя стагоддзі.
Мастацкая экспазіцыя пад назвай «АРТэфакты гульні», па задумцы арганізатараў, будзе спрыяць паспяховаму правядзенню турніраў і натхняць удзельнікаў і балельшчыкаў чэмпіянату. Тут прадэманстраваны рэдкія шахматныя калекцыі з фондаў музея і Палаца Незалежнасці, а таксама карціны беларускіх мастакоў, прасякнутыя шахматнай тэматыкай.
На ўрачыстай цырымоніі адкрыцця адбылася жараб'ёўка удзельнікаў чэмпіянату Беларусі сярод мужчынскіх і жаночых каманд.
Шахматы, бадай, адзіны від спорту, які не мае ўзроставых абмежаванняў. Сярод гросмайстраў міжнароднага класа як сталыя гульцы, так і зусім маладыя. Беларускаму шахматысту, сяміразоваму чэмпіёну і неаднаразоваму прызёру Беларусі Уладзіславу Кавалёву толькі 24. На шахматы яго аддала бабуля - яна заўважыла талент, калі ўнуку было ўсяго сем.
У Беларусі такое яднанне інтэлектуальнага спорту і мастацтва адбываецца ўпершыню. Аднак вопыт правядзення такіх мерапрыемстваў у свеце ёсць. Так, у 2012 годзе матч за сусветную карону прайшоў у Траццякоўскай галерэі. У тым жа годзе Гран-пры па шахматах прымала галерэя выяўленчага мастацтва Узбекістана, пазней шахматна-мастацкую моду падхапіў парыжскі Луўр і пецярбургскі Рускі музей. У Нацыянальным гістарычным музеі чэмпіянат Беларусі будзе праходзіць кожны дзень да 28 студзеня.
