Ад Уладзівастока да Парыжа. Валейбольная каманда "Мінчанка" прывыкае да новых спартыўных рэалій, якія характэрныя для вялікага клуба. І, згуляўшы ў нядзелю перад роднымі трыбунамі, ужо заўтра правядзе сустрэчу Суперлігі ў Краснаярску. Як расце вядучы клуб краіны на сусветнай арэне, раскажа Андрэй Казлоў.
Упершыню беларускія балельшчыкі па-сапраўднаму захварэлі валейболам, калі ўвосень 2017 года жаночая зборная Беларусі, паказаўшы бліскучую гульню, трапіла ў топ-8 каманд кантынента і без адбору выйшла на Еўра-2019.
І ўжо потым флагманскі статус падхапілі прыгажуні з каманды "Мінчанка", якія дабраліся да фіналу Кубка ЕКВ – такога дасягнення ў нашым валейболе не здаралася больш за 30 гадоў!
І вось затым наш жаночы валейбол стаў знаходзіць цалкам новы статус. Нас з задавальненнем прымаюць у Суперлігу, на сёння - адзін з вядучых клубных чэмпіянатаў у свеце, і без адбору запрашаюць у групу Лігі чэмпіёнаў. Узровень у гэтых турнірах - касмічны. Таму пакуль праблемы з вынікам.
На мінулым тыдні на пляцоўцы Палаца спорту "Уручча" адбылося два матчы, як раз розных турніраў. Спачатку беларускі згулялі ў Лізе чэмпіёнаў з "Наварай". Затым - з краснадарскім "Дынама" ў Суперлізе. У абедзвюх сустрэчах прайгралі. Аднак трэба разумець, клуб зараз на новым этапе гісторыі і расце ва ўсіх кампанентах.
Маркетынгавая частка валейбольнага клуба "Мінск", у структуру якога ўваходзіць "Мінчанка", таксама знаходзіць цалкам новыя рысы. На трыбунах працуюць валанцёры. А любы жадаючы можа набыць сувеніры з сімволікай народнай каманды.
Адна з самых таленавітых валейбалістак не толькі Беларусі, але і Еўропы - Ганна Грышкевіч, якая з'явілася на свет у 21 стагоддзі. Ужо зараз яна нясе лідарскі груз адказнасці на пляцоўцы і з'яўляецца фактычна незаменным гульцом.
Пакуль "Мінчанка" навязвае барацьбу, але перамагае нячаста на міжнароднай арэне, аднак ужо зараз стала ўпрыгожваннем Суперлігі - так гавораць саперніцы. Аднак у Беларусі ёй па-ранейшаму роўных няма - нядаўна дзяўчаты са сталіцы ўзялі Кубак Беларусі.
І вось, нягледзячы на такі насычаны год у валейболе, у снежні мы ўбачым два матчы самага высокага ўзроўню. Па-першае, 26 снежня "Мінчанка" згуляе ў гасцях з "Енісеем". Прамая трансляцыя на "Беларусь 5" у 15 гадзін. І, нарэшце, 29 снежня тут, ва "Уруччы", "Мінчанка" правядзе заключны матч сёлета.
