Разам з эстафетай "Полымя міру" ў Гомелі працягвае падарожжа акцыя "Еўрапейскія забегі" #velcombegom

Агонь Еўрапейскіх гульняў набліжаецца да сваёй мэты - факела на мінскім стадыёне "Дынама". Удзельнікі эстафеты ўжо пераадолелі вялікую частку шляху, падарожнічаючы па знакавых месцах 60 населеных пунктаў. 

Сёння агонь сустрэлі ў Гомелі. Палымяны рэйс прайшоў ад Лядовага палаца да самага салодкага прадпрыемства горада. На кандытарскай фабрыцы ўдзельнікаў эстафеты сустракалі са сваім факелам, які па падабенстве арыгінала напярэдадні вырабілі з шакалада. Сюрпрызы чакалі факеланосцаў у кожным пункце маршруту.

Андрэй Балабін, намеснік старшыні Беларускай федэрацыі баскетбола, бізнесмен: "Эмоцыі шыкоўныя. Насамрэч усе ў прадчуванні. Звярніце ўвагу, колькі дзяцей. Гэта цудоўна. Спорт патрэбны для таго, каб мы рухаліся не проста наперад, мы павінны рухаць нацыю. Гэта выдатна".

Яўген Перлін, тэлевядучы Белтэлерадыёкампаніі: "Я ўспамінаю расказы, інтэрв'ю людзей, якія ўдзельнічалі ў Алімпіядзе-80, калі праходзіла Алімпіяда ў Савецкім Саюзе тады яшчэ. І з якім гонарам зараз людзі пра гэта расказваюць. І калі б я прапусціў гэту падзею, я б вельмі шкадаваў. Гэта падзея рэальна крутая: паглядзіце, колькі народу прыходзіць на свята і гэта ўсё яшчэ і аб'ядноўвае - гэта класна".

Разам з эстафетай "Полымя міру"  ў Гомелі працягвае падарожжа і міжнародная акцыя "Еўрапейскія забегі" дабрачыннага праекта #velcombegom. Мэта - дапамагчы дзецям з абмежаванымі магчымасцямі, якія актыўна займаюцца спортам і ў будучыні будуць прадстаўляць Беларусь на міжнародных спаборніцтвах. За 50 дзён удзельнікі акцыі "Еўрапейскія забегі" прабягуць рэкордныя 200 тысяч кіламетраў. А агульная сума дабрачыннай дапамогі ад кампаніі velcom-A1 складзе таксама рэкордныя 200 тысяч рублёў.

Калона факеланосцаў не абышла бокам і жамчужыну паўднёвага рэгіёна - палацава-паркавы ансамбль. Там "Полымя міру" паднялі на 40-метровую вышыню назіральнай вежы. Гучным пунктам маршруту  сталі ўрачыстасці на галоўнай плошчы Гомеля. 

У Гомельскім рэгіёне адзін з сімвалаў ІІ Еўрапейскіх гульняў будзе гасцяваць да 10 чэрвеня. Заўтра ён таксама ў абласным цэнтры. Затым у спісе гарадоў - Жлобін, Мазыр, старажытны Тураў і Нацыянальны парк "Прыпяцкі".