Лепшы трэнер Беларусі ўзначаліў маскоўскі ЦСКА. Аб прызначэнні Віктара Ганчарэнкі актыўна гаварылі яшчэ на мінулым тыдні, але падпісанне кантракта адбылося менавіта сёння. ЦСКА - адзін з самых тытулаваных клубаў Расіі, дзеючы чэмпіён. Але ў галоўным еўракубку - Лізе чэмпіёнаў - каманда не вызначаецца. Магчыма, менавіта Ганчарэнка выведзе чырвона-сініх на новы ўзровень. Прынамсі, з БАТЭ гэта ў яго атрымлівалася выдатна.
Павел Капуцкі пра кар'ерны ўзлёт. Гэта пры ім клуб БАТЭ упершыню выйшаў у Лігу чэмпіёнаў. Гэта ён выйграў у Мінску, здавалася б, у непераможнай "Баварыі". Гэта ён шэсць разоў станавіўся лепшым трэнерам Беларусі. 39-гадовы ўраджэнец гарадка Хойнікі Гомельскай вобласці з-за траўмы рана скончыў кар'еру гульца, затое своечасова стаў трэнерам.
У мінулым сезоне беларус асісціраваў Леаніду Слуцкаму ў ЦСКА. Трэнеры маюць добрыя зносіны яшчэ з часоў, калі беларус працаваў у БАТЭ. Замена меркавалася ўлетку, але Слуцкі ў зборную Расіі ўсё-такі не пайшоў, а Ганчарэнка адазваўся на прапанову сціплай "Уфы".
Віктар Ганчарэнка, галоўны трэнер ФК ЦСКА (Масква, Расія): "Быў я ў трэнерскім штабе ЦСКА і не ўтойваў, што калі будзе нейкая прапанова, вядома, я яе буду прымаць. Не было такога, што я сядзеў і чакаў, калі вызваліцца месца Леаніда Віктаравіча. Ці былі нейкія дамоўленасці з ЦСКА. Не. Пры першай магчымасці вярнуўся да таго, што я больш за ўсё люблю".
"Уфа" пад кіраўніцтвам Ганчарэнкі абгуляла маскоўскія "Спартак" і "Лакаматыў". Каманда па выніках першай часткі чэмпіянату заняла высокае восьмае месца. Слуцкі тым часам зразумеў, што за сем гадоў у ЦСКА стаміўся, і падаў у адстаўку.
У момант поціску рукі з прэзідэнтам ЦСКА Яўгенам Гінерам наш трэнер выглядае па-сапраўднаму шчаслівым. Пагадненне разлічанае на два гады. Ёсць опцыя прадаўжэння.
У маскоўскія клубы звычайна запрашаюць або замежных трэнераў, або сваіх, расійскіх. Прабіцца цяжка. Тры гады таму ўдалося яшчэ аднаму беларусу - Леаніду Кучуку. Летам 2013-га ён узначаліў "Лакаматыў", але пратрымаўся крыху больш чым год, хаця выйграў бронзу чэмпіянату.
Васіль Уткін выказаўся ў "Твітэры" яшчэ да прызначэння Ганчарэнкі, хаця напэўна здагадваўся, хто ўзначаліць "армейцаў". Беларус аказаўся пад сур'ёзным націскам. Масква памылак не даруе. Але лепшы трэнер Беларусі прывык прымаць выклікі.
