"Натхняць на рух" - ідэя новай калекцыі адзення ад Дар'і Домрачавай

25 Кастрычніка 2018

Сёння ў рамках праекта Brands Fashion Show адбыўся яркі подыумны дэбют спартыўнага брэнда ад адзінай у гісторыі біятлона чатырохразовай алімпійскай чэмпіёнкі. У чэрвені гэтага года Дар'я Домрачава аб'явіла аб завяршэнні кар'еры і сканцэнтравалася на сваёй сям'і, а таксама на новай любімай справе - марцы па вытворчасці спартыўнага адзення для мужчын, жанчын і дзяцей. Мадэлямі ў паказе Дар'і сёння выступілі прызёры і чэмпіёны Алімпіяд, чэмпіянатаў свету і Еўропы розных гадоў у розных відах спорту, а таксама зоркі шоу-бізнесу, уключаючы вядучых Белтэлерадыёкампаніі. Ідэя стварыць сваю лінейку адзення нарадзілася тры гады таму.

Дар'я Домрачава, чатырохразовая алімпійская чэмпіёнка па біятлоне:

"Ідэя стварэння чагосьці спартыўнага менавіта ад сябе ўзнікла каля трох гадоў таму, калі мы праводзілі нашу першую гонку легенд у Раўбічах. Мне хацелася стварыць такі своеасаблівы масток паміж мной і маімі балельшчыкамі, каб у людзей з'явілася магчымасць атрымаць часцінку мяне, часцінку чагосьці ад душы, таму што насамрэч вельмі вялікая колькасць людзей падтрымлівала мяне праз экраны ТБ, шматлікія прыязджалі на этапы Кубка свету. І гэта для мяне каштоўна, важна, таму мне хацелася зрабіць своеасаблівы падарунак ад сябе, каб людзі змаглі прылучыцца да біятлона да спорту яшчэ бліжэй".

Уле-Эйнар Б'ёрндален, васьміразовы алімпійскі чэмпіён па біятлоне:

"Дар'я шмат працавала. На мой погляд, калекцыя атрымалася цікавай і яркай. Дзякуй усім, хто дапамагае ёй сёння, дзякуй мадэлям - у жыцці яны спартсмены, але сёння выйшлі на подыум дзеля Дашы, што няпроста. Спадзяюся, яны атрымалі задавальненне".

У завяршэнні паказу Дар'я Домрачава і Уле-Эйнар Б'ёрндален пад авацыі залы выйшлі да публікі, падзякаваўшы гасцям і мадэлям.

Дарэчы, брэндам спартсмены засталіся задаволеныя, не выключыўшы магчымасць, што менавіта ў гэтай экіпіроўцы атлеты будуць паднімацца на п'едэсталы чэмпіянатаў Еўропы і свету.