Адкрыць свае схаваныя магчымасці або асвоіць рамяство сапраўдных мушкецёраў - старажытныя адзінаборствы прыцягваюць усё больш увагі з боку маленькіх мінчан. Усяго ў сталіцы больш за паўсотні школ розных відаў баявых мастацтваў. Тут дзеці не толькі накіруюць сваю энергію на карысць здароўю, але і асвоюць унікальныя навыкі.
Напрыклад, на ушу дзятва навучыцца кантраляваць нават сілу саперніка. А таэквандо дадасць целу не толькі фізічнай сілы, але і гнуткасці. Майстар-клас па самаабароне ад маленькіх мінчан атрымаў Ян Пашкевіч.
Мастацтва сілы, гнуткасці і... самаабароны – менавіта гэтым карэйскае таэквандо прываблівае Паліну Ляўчук. Дзяўчынка з дзяцінства захаплялася гімнастыкай, ідэальная расцяжка дазваляе без праблем асвойваць нават самыя складаныя прыёмы. Таленты Паліны ацанілі і трэнеры - хутка яна атрымае зялёны пояс.
Трэніроўкі праходзяць па старажытнай усходняй сістэме – развіваецца не толькі мускулатура, але і ўменне цалкам кантраляваць сваё цела. Асноўная частка спартыўнай практыкі – адточванне ўдараў нагамі і складаныя тэхнічныя прыёмы.
Кітайскае мастацтва «барацьбы пяці жывёл» або ўшу навучыць дзяцей не толькі кантраляваць сваю сілу, але нават моц саперніка. Тысячы гадоў таму ўсходнія манахі жылі сярод дзікіх жывёл, пераймалі іх рухі і аб'ядналі ў практыкаванні, якія развіваюць здольнасці чалавека.
Хуткія рухі і імгненная рэакцыя – асвоіць майстэрства валодання самай элегантнай зброяй прапануюць сталічныя школы па фехтаванні.
Зараз я трымаю ў руках рапіру, менавіта з такой зброяй калісьці трэніраваліся сапраўдныя мушкецёры. Клінок амаль метр у даўжыню важыць паўкілаграма, і яго вельмі зручна трымаць у руцэ.
Фехтаваць «мушкецёры»-пачаткоўцы вучацца на рапірах, шаблях і шпагах. Зброя адрозніваецца памерам і тэхнікай вядзення бою. Падчас дуэлі сапернікі выкарыстоўваюць розныя стратэгіі і тактыкі.
Акрамя таго, свае веды маленькім мінчанам перадаюць і майстры японскага айкідо, бразільскай капаэйры і тайскага бокса. Усяго ў сталіцы больш за паўсотні школ баявых мастацтваў розных народаў свету. Там дзеці атрымліваюць не толькі фізічную загартоўку, але і пазнаюць мудрасць продкаў.
