У гэтыя выхадныя беларусаў ізноў чакае вялікае спартыўнае свята на кортах "Чыжоўка-Арэны". Жаночая зборная Беларусі па тэнісе паспрабуе захаваць прапіску ў Сусветнай групе Кубка Федэрацыі, дзе гуляюць 8 самых моцных каманд у свеце. Для гэтага нашым дзяўчатам у галоўным матчы года неабходна абгуляць каманду Славакіі. Жараб'ёўка турніру пройдзе ў пятніцу, а паядынкі запланаваны на суботу і нядзелю.
Аб прадматчавых раскладах - Алена Гарэльчык. Фінальны матч турніру ў Лугане. Арына Сабаленка супраць Элізе Мертэнс. На трыбуне камера раз-пораз выхоплівае Веру Лапко і новага старога капітана нашай каманды Таццяну Пучак. Разам з Сабаленкай гэтым жа вечарам Лапко змагалася за тытул і ў парным разрадзе. Дзяўчаты абмежаваліся званнем фіналістак. Крыху раней тут закончыла сваё выступленне Аляксандра Сасновіч.
У Лугане нашы дзяўчаты гулялі на грунце, пакрыццё на паядынак Кубка Федэрацыі на правах краіны-гаспадыні мы выбралі традыцыйны хард. Але таксама як 14 гадоў таму на аналагічнай стадыі плэй-оф Сусветнай групы славачкі ў сябе дома прапанавалі нашым тэнісісткам грунт. Гэта была першая спроба беларусак прабіцца ў плэй-оф элітнага дывізіёна. Сярод гульцоў у тым матчы цяпер капітан зборнай Таццяна Пучак.
З-за праблем са здароўем у Мінск не прыехалі лідары славацкай зборнай - Дамініка Цыбулкава і Магдалена Рыбарыкава. Затое самыя пазітыўныя эмоцыі пасля перамогі на грунтавым турніры ў Багаце прывезла да нас Ганна Караліна Шмідлава.
У параўнанні з папярэднім раўндам капітан славацкай каманды Мацей Ліптак зрабіў усяго адну замену - замест Рыбарыкавай заявіў маладую Шрамкаву, а вось склад беларускай зборнай застаўся нязменным.
Мацей Ліптак, капітан жаночай зборнай Славакіі па тэнісе: "Рэйтынг беларусак значна лепшы, ваша каманда з'яўляецца фаварытам. Але нам губляць няма чаго, у нас у складзе два сур'ёзныя і вопытныя гульцы, якія раней уваходзілі ў топ-30 і ў топ-50 сусветнага рэйтынгу, і 2 юныя і перспектыўныя спартсменкі. Я заўсёды гавару, што рэйтынг - гэта рэйтынг, а матчы Кубка Федэрацыі - гэта зусім іншае. Таму ўбачым, што будзе на корце".
У выпадку перамогі над славачкамі нашы тэнісісткі захаваюць прапіску ў наймацнейшым дывізіёне Кубка Федэрацыі - тут гуляе ўсяго 8 каманд. І тады ў лютым будучага года пачнецца новы шлях па прэстыжны трафей. Той, хто прайграе беларуска-славацкае супрацьстаянне, апынецца ў другой Сусветнай групе і будзе змагацца за выхад у першую.
