Сёння ў Беларусі завяршыўся абласны этап спаборніцтваў сярод дзяцей і падлеткаў "Снежны снайпер" на прызы Прэзідэнцкага спартыўнага клуба. Спаборніцтвы сталі традыцыйнымі і праводзяцца з 2007 года. У турніры ўдзельнічаюць аматары біятлона, якія не займаюцца ў спецыялізаваных навучальна-спартыўных установах.
Тры ўзроставыя групы - ад 11 да 16 гадоў. Па ўсіх абласцях краіны ў гэтыя дні змагаліся каля 1,5 тысячы школьнікаў. Гэта кадры спаборніцтваў у Мінскай вобласці, іх прымаў цэнтр алімпійскай падрыхтоўкі па зімовых відах спорту "Раўбічы". У абласныя старты тут адабралася амаль 300 вучняў. У рэспубліканскі жа фінал выбралі толькі 24 самых хуткіх і трапных.
Менавіта на гэтай лыжні ў канцы лютага пройдзе чэмпіянат Еўропы па біятлоне і Гонка легенд. Пакуль жа ў спрынтарскіх гонках і эстафетах трасу выпрабавала падрастаючае пакаленне. У шматлікіх удзельнікаў, дарэчы, думкі аб спартыўнай кар'еры з'яўляюцца менавіта на падобных стартах. Сёння ў Раўбічах ушаноўвалі фіналістаў. На цырымоніі ўзнагароджання прысутнічаў старшыня цэнтральнага савета Прэзідэнцкага спартыўнага клуба Дзмітрый Лукашэнка.
Рэспубліканскі фінал "Снежнага снайпера" таксама пройдзе ў Раўбічах з 8 па 10 лютага. А з 18-га па 24-га спарткомплекс прыме Адкрыты чэмпіянат Еўропы па біятлоне і Гонку легенд.
