Шанец на алімпійскія ўзнагароды з'явіўся ў тых, хто марыць пра медалі. У 2019 годзе Мінск прыме Еўрапейскі юнацкі алімпійскі фестываль.
Упершыню гульні пройдуць на арэнах топ-узроўню, і гэта стала адным з ключавых момантаў у заяўцы беларускай сталіцы. Спаборніцтвы праводзяцца раз на два гады. Беларусы на правах гаспадароў змогуць выставіць поўныя каманды ва ўсіх 9 відах спорту.
Расказвае Алёна Гарэльчык.
Гістарычны для беларускага спорту момант. У Баку на 43-й Генасамблеі еўрапейскіх алімпійскіх камітэтаў пасля аднагалоснага рашэння была падпісана трохбаковая дамова аб правядзенні ў Мінску ў 2019 годзе Летняга юнацкага алімпійскага фестывалю. 15-га ў гісторыі нашага кантынента.
Пра заяўку на правядзенне еўрапейскай юнацкай Алімпіяды ўпершыню загаварылі два гады таму. За гэты час Беларусь не раз наведалі прадстаўнікі ЕАКа: інфраструктура, транспарт, спартыўныя аб'екты і гасцініцы. Мінск - горад, дзе любяць спорт, - галоўная выснова, зробленая еўрапейскімі функцыянерамі, стала ў выніку слоганам будучага фестывалю.
Мінск можа па праве прэтэндаваць на званне спартыўнай еўрапейскай сталіцы. Шмат у чым дзякуючы інфраструктуры, якая была збудаваная да чэмпіянату свету па хакеі. Прычым лядовыя пляцоўкі лёгка трансфармуюцца пад іншыя віды спорту. Напрыклад, падчас фестывалю Палац спорту прыме турнір гімнастаў, а на Мінск-Арэне будуць гуляць у баскетбол. Упершыню ў гісторыі форуму спаборніцтвы пройдуць на арэнах топ-узроўню. Беларускія спартсмены на правах гаспадароў атрымалі магчымасць без папярэдняга адбору выставіць поўныя каманды ва ўсіх дысцыплінах.
Усяго ж у праграме фестывалю іх 9. Апроч названых, гэта дзюдо, веласпорт, тэніс, плаванне, гандбол, валейбол і лёгкая атлетыка. Ужо зараз інфраструктура гатовая для ўсіх відаў, акрамя каралевы спорту. Лёгкую атлетыку прыме абноўлены да канца 2017 года пасля рэканструкцыі стадыён Дынама.
Максім Рыжанкоў, памочнік Прэзідэнта Рэспублікі Беларусь па пытаннях фізічнай культуры, спорту і развіцця турызму:
Акрамя пажаданняў па правядзенні спаборніцтваў па лёгкай атлетыцы, у нас ужо ёсць выразныя абавязацельствы. Мы падпісалі кантракт, дзе выразна прапісана, што лёгкаатлетычныя спаборніцтвы будуць праходзіць на стадыёне Дынама, таму кроў з носа, а гэты стадыён трэба будзе дарабіць.
Алімпійскі фестываль - праект, хутчэй, іміджавы. Гэта выдатная магчымасць паказаць усе магчымасці беларускай сталіцы ў плане арганізацыі спартыўных форумаў любога ўзроўню. Фінансавую дапамогу беларускаму боку акажа ЕАК, да таго ж усе выдаткі па пражыванні, харчаванні і размяшчэнні бяруць на сябе НАКі краін-удзельніц. Сам жа фестываль павінен стаць першым крокам на шляху да новай мэты - еўрапейскіх Алімпійскіх гульняў.
Паўгода даецца арганізатарам, каб сфарміраваць камітэт і пачаць працу. Хутка абвесцяць конкурс на промаролік фестывалю, эмблему і маскота - афіцыйнага талісмана форуму.
Эстафета і запальванне алімпійскага агню, парад нацый і цырымонія адкрыцця, клятва спартсменаў і суддзяў і ўзняцце алімпійскага флага - пры правядзенні фестывалю павінны быць выкананыя ўсе працэдуры Міжнароднага алімпійскага камітэта. Але не гэта галоўнае, а барацьба, рызыка і жаданне перамагчы дома для тых спартсменаў, каму сёння толькі 10.
