Уле-Эйнар Б’ёрндален, Халвар Ханевалд, Ларс Бергер, Карын Аберхофер, Сімона Хаўсвальд, зразумела, Дар'я Домрачава і Надзея Скардзіна - зноў выйшлі на старт, каб вызначыць лепшага. Балельшчыкаў чакалі мас-старты і змяшаная эстафета. Падзея грандыёзная: фінальным акордам "Гонкі легенд" сталі праводзіны Дашы і Надзі з вялікага спорту. Убачыць на ўласныя вочы, без перабольшання, эпахальны момант у Раўбічы прыехалі сотні балельшчыкаў. Але нашы алімпійскія чэмпіёнкі падкрэсліваюць у інтэрв'ю - "сёння сумаваць не варта". У Беларусі ўвесь тыдзень - свята спорту. Эстафету ад "Гонкі легенд" прыняў чэмпіянат Еўропы па біятлоне, у суботу нас чакае этап Кубка свету па фрыстайле. Але пра ўсё па парадку - Станіслаў Ліпскі. Напярэдадні ён сачыў за афіцыйнай трэніроўкай удзельнікаў стартаў, сёння ж працаваў непасрэдна на "Гонцы легенд".
Нядзеля. 14:00. Удзельнікі "Гонкі легенд" у Раўбічах на афіцыйнай трэніроўцы. Дар'я Домрачава з-за хваробы адсутнічае: Б’ёрндален, Ханевалд, Аберхофер, Драчоў, Скардзіна - тут. Шанец адчуць лыжню і стрэльбішча выпускаць нельга: бо спаборніцкі складальнік ніхто не адмяняў - трапіць на п'едэстал у панядзелак марыць кожны.
А ўжо ўвечар удзельнікі "Гонкі легенд" змянілі трэніровачныя камбінезоны на вячэрнія сукенкі і смокінгі. У адным са сталічных гатэляў у неверагодна цёплай атмасферы прайшла святочная вячэра, прысвечаная не толькі маючаму адбыцца старту, але і провадам з прафесійнага спорту Дар'і Домрачавай і Надзеі Скардзіны. Сярод запрошаных гасцей - прадстаўнікі Міністэрства спорту і турызму, Нацыянальнага алімпійскага камітэта, Прэзідэнцкага спартыўнага клуба, трэнеры, родныя і блізкія. Нашы алімпійскія чэмпіёнкі са слязамі на вачах падзякавалі кожнаму, хто быў побач на працягу ўсёй кар'еры, хто заўсёды верыў і падтрымліваў.
А затым настаў панядзелак - яшчэ больш насычаны: стартаваў ён з майстар-класа для фіналістаў рэспубліканскіх спаборніцтваў сярод дзяцей і падлеткаў "Снежны снайпер". Юныя атлеты пагутарылі з кумірамі, ва ўзнагароду за сваю працу пры гэтым атрымаўшы лепшыя месцы на цэнтральнай трыбуне.
Балельшчыкі з усмешкамі і захапленнем сустракалі сваіх куміраў - легенды ў сваю чаргу адказвалі ўзаемнасцю: сустрэча была мімалётнай, але адназначна для кожнага балельшчыка біятлона яна застанецца ў памяці назаўжды.
У выніку адведзеных 60 хвілін не хапіла, каб надаць увагу кожнаму - таму пасля бліц-інтэрв'ю нашай здымачнай групе Дар'я даручыла адказнае заданне.
Выканаўшы даручэнне Героя Беларусі, з чыстым сумленнем адправіліся на цырымонію адкрыцця чэмпіянату Еўропы і "Гонкі легенд". Перапоўненыя трыбуны - візітная картка спарткомплекса, пра што ў сваім інтэрв'ю ў прамым эфіры тэлеканала "Беларусь 5" падкрэслівае чатырохразовы алімпійскі чэмпіён па біятлоне Аляксандр Ціханаў. Але гэта не дзіўна, з той павышанай увагай, з якой у нашай краіне ставяцца да спорту.
Удзельнікі "Гонкі легенд" тым часам размінаюцца, да старту лічаныя хвіліны. Толькі ўявіце, адразу 12 алімпійскіх чэмпіёнаў выступілі ў Раўбічах сёння.
Удзельнікаў мас-старту чакалі два агнявыя рубяжы: у адсутнасць Дар'і Домрачавай - Надзея Скардзіна захапіла лідарства - першы агнявы рубеж пройдучы на нуль.
Другая стральба ў Надзеі таксама атрымалася чыстай - свой заключны мас-старт беларуска ў выніку выйграла. Другая - Ганна Багалій, трэцяя - Сімона Хусвальд.
Андрэй Дзерызямля з Украіны выйграў аналагічны мужчынскі старт, другі - Уле-Эйнар Б’ёрндален, трэцім фінішаваў беларус Сяргей Новікаў.
Разыначка на торце - змяшаная эстафета атрымалася яшчэ больш напружанай: пары ўдзельнікаў на вашым экране.
Даша і Надзя, адстраляўшы чыста, першымі перадалі свае эстафеты. Б’ёрндален і Новікаў пачын сваіх палавінак падтрымалі, а вось на трэцяй стральбе Даша дапусціла промах - сімвалічны або не, маўляў, "я ў прафесійным біятлоне яшчэ не ўсё сказала" - невядома, але ўсё ж на заключны круг Даша адправіла мужа першым. Апошняя стральба атрымалася для Вялікага нарвежца няўдалай - тры промахі, а вось Сяргей Новікаў з адным штрафам усё ж утрымаў першае месца.
Фрудэ Андресан і Ганна Багалій - трэція.
Узнагародзіўшы трыумфатараў "Снежнага снайпера" Дар'я і Надзея, зразумела, выступілі перад запоўненымі трыбунамі спарткомплекса.
Вось такім яркім атрымаўся заключны акорд "Гонкі легенд". Мы не гаворым Дашы і Надзі пакуль, мы гаворым ім да пабачэння. Яны выкралі часціцу нашага сэрца, і ў кожным з нас застануцца назаўжды. Тыя моманты трыумфу, якія дзяўчыны нам падарылі, у нас не забярэ ніхто і ніколі. Дзякуй, Даша! Дзякуй, Надзя! Мы вас любім!
