Пераможныя навіны для нас прыходзяць адразу з двух планетарных форумаў. З венгерскага горада Сегеда, дзе праходзіць чэмпіянат свету па веславанні на байдарках і каноэ, а таксама з Раўбіч - з сусветнага форуму па летнім біятлоне. І пачнём з веславання. Сёння медальная скарбонка беларусаў папоўнілася адразу трыма ўзнагародамі і трыма алімпійскімі пуцёўкамі ў Токіа. Зараз у нашай зборнай шэсць узнагарод. З іх чатыры залатыя, сярэбраная і бронзавая.
Свой высокі клас ізноў прадэманстравалі Марына Літвінчук і Вольга Худзенка. У алімпійскай дысцыпліне ў заездзе байдарак-двоек на дыстанцыі 500 метраў нашы дзяўчаты выйгралі яшчэ адно золата і сталі такім чынам двухразовымі чэмпіёнкамі свету. Учора ім не было роўных на дыстанцыі 200 метраў.
Яшчэ адзін медаль вышэйшай пробы сёння прынеслі нашы байдарачнікі Станіслаў Дайнека і Дзмітрый Натынчык. Беларусы ўпэўнена абышлі сапернікаў у заездзе на дыстанцыі 500 метраў. І вось першыя эмоцыі новаспечаных чэмпіёнаў свету.
З перамогай нашых весляроў павіншаваў Прэзідэнт: "Дарагія Марына, Вольга, Станіслаў і Дзмітрый!
Віншую з заваяваннем залатых медалёў чэмпіянату свету ў гонках на дыстанцыі 500 метраў сярод байдарак-двоек. Дзякуючы высокаму спартыўнаму майстэрству, выдатнай фізічнай форме і мэтанакіраванасці вы выканалі пастаўленую задачу і апраўдалі надзеі беларускіх аматараў спорту".
Сапраўдную волю да перамогі сёння прадэманстравала і Алена Наздрова. У заездзе каноэ-адзіночак на дыстанцыі 200 метраў яна не толькі выйграла ліцэнзію на алімпіяду ў Токіа, але і вырвала на фінішы бронзавы медаль.
Напярэдадні Алена стала чэмпіёнкай - прыйшла першай на дыстанцыі 500 метраў. Узнагароду найвышэйшай вартасці ў скарбонку зборнай дадаў і наш залаты экіпаж у асобе Марыны Літвінчук і Вольгі Худзенкі. Медальны пачын нашых дзяўчат падтрымаў і байдарачнік Мікіта Борыкаў. Ён заваяваў серабро на дыстанцыі 500 метраў.
Па выніках першага фінальнага дня нашых спартсменаў таксама падтрымаў Кіраўнік дзяржавы. Прэзідэнт накіраваў персанальныя віншаванні ўладальнікам залатых медалёў, а таксама выказаў словы ўдзячнасці ўсёй нацыянальнай камандзе па веславанні на байдарках і каноэ.
Заўтра на чэмпіянаце свету заключны дзень. А значыць і новыя старты. Беларускім веслярам удалося прабіцца ў 11 фіналаў. Сярод іх 4 - на алімпійскіх дыстанцыях. Прамыя трансляцыі глядзіце на "Беларусь 5" у 12:05 і 14:05.
У беларусаў на чэмпіянаце свету па веславанні на байдарках і каноэ 6 узнагарод: 4 залатыя, сярэбраная і бронзавая
24 августа 2019