Цырымонія адкрыцця летняга чэмпіянату свету па біятлоне адбудзецца ў Раўбічах у гэту пятніцу

21 Жніўня 2019

Зараз пра падзею, якую краіна чакала без малога 20 гадоў. Раўбічы гатовыя да чэмпіянату свету па летнім біятлоне. Спартсмены ўжо выпрабавалі трасу. Балельшчыкі ў прадчуванні. У найбліжэйшыя дні сюды прыбудуць зоркі сусветнага біятлона. Зборная Беларусі выступіць наймацнейшым складам. У заяўку ўключаны і алімпійскія чэмпіёнкі: Дынара Алімбекава і Ірына Крыўко. Аб планетарным форуме  Крысціна Камыш

Гэта ўнікальныя кадры дваццацігадовай даўнасці. Дакладная стральба Святланы Парамыгінай. У 1999 годзе Раўбічы прымалі чэмпіянат свету па летнім біятлоне. Тады спартсмены спаборнічалі ў кросавых гонках. У Беларусі былі дзве залатыя і дзве сярэбраныя ўзнагароды. 

Зараз  планетарны форум пройдзе на лыжаролерах.

Каманды прыехалі, засяліліся. Беларуская зборная прыбудзе з Антхольца заўтра. Тады ж адбудуцца і першыя афіцыйныя трэніроўкі. У заяўцы на чэмпіянат свету 26 зборных і каля 300 спартсменаў.

Юрый Альберс, галоўны трэнер зборнай Беларусі па біятлоне: "Усе наймацнейшыя ў лыжаролерах прыехалі. Разглядаюць скрозь прызму падрыхтоўкі ў Алімпіядзе. Чакаем ад нашых добрых выступленняў".

Зараз у Раўбічах ідзе апошняя падрыхтоўка. 

Для тэхнічных дэлегатаў IBU цяперашні старт - яшчэ адна магчымасць пераканацца, што ўсё будзе выдатна і на этапе Кубка свету ў 2022 годзе. Правядзенне летняга чэмпіянату свету па біятлоне  было абавязковай умовай пры атрыманні права на зімовы этап. 

Рыхтуюцца і тэлевізіёншчыкі. Пакажуць біятлон дзве ПТС, 3 краны, 35 камер, адна з іх будзе на рэйках. Пераможны склад не змяняюць. Адпрацуюць чэмпіянат свету тыя ж здымачныя брыгады, што і кантынентальны форум у лютым. 

Для зручнасці балельшчыкаў з пятніцы па нядзелю арганізавана праца экспрэснага прыгараднага маршруту з Мінска ў Раўбічы. Аўтобус № 449 будзе курсіраваць з інтэрвалам  10-15 хвілін ад станцыі метро "Барысаўскі тракт" прама ў цэнтр алімпійскай падрыхтоўкі. 

У пятніцу ў 9 раніцы пройдзе цырымонія адкрыцця летняга чэмпіянату свету па біятлоне. У праграме спаборніцтваў у гэты дзень суперспрынт. Першыя медалі будуць разыграны ў 15:30. У суботу па плане  спрынт, а ў нядзелю - гонкі праследавання.